Pjetur Hafstein Lárusson

22.9.2007 | 21:27

Tvítyngd stjórnsýsla, draumsýn varaformanns Samfylkingarinnar

Efnishyggja er höfuð böl okkar tíma. Hún bætir að vísu veraldlega stöðu sumra um tíma en skapar um leið öðrum eymd. En þegar til lengri tíma er litið, er megin hættan sem af henni stafar sú, að menn hætta að greina hismið frá kjarnanum. Það verður aðalatriði "að hafa það gott", eins og það er kallað, þ.e.a.s. að njóta auðs, en ekki að nýta efnisleg verðmæti, til að skapa andlegan auð. Þá verður margur af aurum api.

Líkja má auði, sem metinn er án annarra viðmiða en sjálfs sín, við tré, þar sem apar kasta sér frá einni grein yfir á þá næstu. Það eru þeir, sem hafa orðið af aurum apar. Aurinn er þeirra guð og hagkvæmnin þeirra biblía. Þetta eru sanntrúaðir, þótt tæpast geti trúin talist háþróuð. Og eins og títt er með slíka, er öllu fórnandi fyrir trúna.

Því flýgur mér þetta í hug, að í Morgunblaðinu í dag, laugardag, ritar varaformaður Samfylkingarinnar og formaður viðskiptanefndar alþingis, Ágúst Ólafur Ágústsson grein, þar sem hann leggur til, að Íslendingar hugi að því, að gera enska tungu jafna þeirri íslensku í stjórnsýslu landsins, því það yrði svo gott fyrir erlenda fjárfesta! Og takið nú eftir: Þessi maður á sæti á því sama alþingi og Jón Sigurðsson sat á forðum tíð!

Því nefni ég Jón Sigurðsson, að hann barðist jafnt fyrir verslunarfrelsi og þjóðlegri menningu. Honum var ljóst, að okkur væri þörf á samskiptum við umheiminn, en um leið var hann þess minnugur, að sá hagnaður, sem verslunarfrelsið skapaði, skyldi nýtast þjóðinni til andlegra framfara, ekki síður en veraldlegra.

Ver þú þess minnugur, Ágúst Ólafur, að þú ert Íslendingur og átt íslensku fólki fremd þína að þakka.

Flokkur: Stjórnmál og samfélag | Facebook