Jákvæðar fréttir í landsbyggðablöðum

Í spjalli mínu í gær, sagði ég frá útvarpsviðtali við herra Sigurbjörn Einarsson biskup.  Eitt af því, sem hann fjallaði um í þessu viðtali, var sú áhersla, sem fjölmiðlar leggja á neikvæðar fréttir á kostnað þess, sem jákvætt er.  Vissulega eru þetta orð í tíma töluð, þegar rætt er um þá fjölmiðla, sem ná til fólks um land allt.  Morgunblaðið er þó að mestu leyti undanskilið.    Sé hins vegar litið til landsbyggðarblaðanna, hvort heldur er héraðsblaða eða blaða, sem fyrst og fremst eru ætluð til lestrar í einstökum bæjum og nærsveitum, blasir allt annað við augum.  Oftar en ekki flytja þessi blöð, eða a.m.k. þau þeirra, sem ég sé, jákvæðar fréttir.

Nú ætla ég ekki að halda því fram, að það geti talist stórbrotin fréttamennska, að segja frá nýju hárgreiðslustofunni hennar Bínu Jóns.  En þetta eru nýtilegar upplýsingar fyrir fólkið í bænum og næstu sveitum.  Eins er það með fréttir af bændum, sem kaupa nýja mjaltavél.  Slíkt telst ekki til tíðinda á heimsmælikvarða, en varpar eigi að síður ljósi á líf fólksins í landinu.  Slíkur fréttaflutningur er jákvæður og þar af leiðandi uppbyggjandi.  Og meðal annarra orða; hvað er svona stórbrotið við fréttamennsku yfirleitt?  Ég hef ekki starfað mikið við blaðamennsku, en nóg til þess að vita, að þar gildir það sama og á öllum öðrum vinnustöðum, nefnilega listin að skila góðu dagsverki. 

Vissulega gerist margt neikvætt í heimi hér og ástæðulaust, að draga fjöður yfir.  En að skrumskæla atburði og ummæli manna, eingöngu til þess að búa til „fréttir" og hafa þær sem allra neikvæðastar, það á ekkert skylt við fréttamennsku.  Ýmsum blaðamönnum í Reykjavík væri hollt að fletta reglulega „sveitablöðunum", þeir gætu lært ýmislegt á síðum þeirra.

Athugasemdir

[Hlynur Þór Magnússon, 10.4.2007 kl. 22:25]

Leyfi mér í þessu sambandi að benda á þessa bloggfærslu: http://maple123.blog.is/blog/maple123/entry/170638/

[Halldór Egill Guðnason, 11.4.2007 kl. 02:17]

Gæti ekki verið meira sammála þér. Oft á tíðum ömurlegt að sjá hve lítið frétta og blaðamenn hafa fyrir því að byrta okkur fréttir. Nánast allt étið upp eftir erlendum fréttamiðlum þegar fjallað er um mál úti í heimi, en á sama tíma sjá þeir ekki góðu fréttirnar sem ég held að við viljum einnig heyra af. Gott hjá þér.

[Halldór Egill Guðnason, 11.4.2007 kl. 02:27]

Setti ég virkilega y í birta? "Ja so bara."