Pjetur Hafstein Lárusson

15.6.2010 | 13:39

Meinleg málfarsvilla í DV

Undarleg verður að teljast sú fullyrðing DV, að upplýsingafulltrúi Landsbankans, hafi orðið geðveikur við það að detta niður tröppur og handleggsbrotna. Að vísu brotnað hann á báðum handleggjun, en mér er sama. Mér vitanlega er ekkert samhengi milli beinbrota og geðheilsu.

Að öllu gamni slepptu, er ég ekki alveg viss um, að blaðamaðurinn á DV hafi vitað, hvað hann var að skrifa. Í raun var hann aðeins að fjalla um handleggsbrotin. En hann gerði það með þeim orðum, að upplýsingafulltrúinn "gengi ekki heill til skógar", vegna meiðsla sinna. Það orðatiltæki merkir, að vera ekki heill á geðsmunum.

Vonandi verður það aldrei með sanni sagt, hvorki um upplýsingafulltrúa Landsbankans né blaðamanninn sem skrifaði fréttina, að þeir gangi ekki heilir til skógar.

Flokkur: Menntun og skóli | Facebook

Athugasemdir

Þetta er einfaldlega rangt hjá þér. Að ganga ekki heill til skógar merkir einfaldlega að búa við skerta heilsu, andlega eða líkamlega.

Ragnar Þór Pétursson (IP-tala skráð) 15.6.2010 kl. 14:19

Pétur minn. Ertu viss um að þetta sé rétt hjá þér? Sjálfur hef ég vanist því að sá sem ekki gengur heill til skógar á við EINHVERJA vanheilsu að striða, annað hvort líkamlega eða andlega.

Tómas H Sveinsson, 15.6.2010 kl. 14:38

fann þessa skýringu á netinu, vísindavefurinn.

Svar

Merking orðatiltækisins að ganga ekki heill til skógar er að vera ekki við góða heilsu, eiga við meiðsl eða veikindi að stríða.

Elsta dæmi Orðabókar Háskólans er fengið úr Safni af íslenzkum orðskviðum eftir Guðmund Jónsson sem gefið var út árið 1830. Þar er orðatiltækið prentað: ,,Hann gengr ekki heill til skógar, sem af er höndin, og virðist átt við að sá sem á vantar höndina nýtist ekki að fullu við skógarhögg eða aðra vinnu sem sinna þarf þar sem viður vex. Merkingin hefur síðar færst yfir á hvers kyns veikindi óháð skógarvinnu ef sú gerð sem Guðmundur birtir er hin upphaflega.

Þór Ómar Jónsson, 15.6.2010 kl. 22:26

Við rífumst varla við Orðabókina. Mér er þó farið líkt og Pétri, að ég man ekki til að þetta orðatiltæki hafi verið notað um slasað fólk, heldur eingöngu um þá sem ekki eru með "fulla fimm".