Ferðagleði forsetans

"Gamla konu langar í ferðalag", segir Laxness í Íslandsklukkunni um móður þess mæta manns, Jóns Hreggviðssonar.  Sjálfur fór Jón víða, sem kunnugt er, óð hið blauta Holland, arkaði yfir Þýskaland og gerðist loks soldát vors arfakóngs.

Hvorki eigum við Íslendingar lengur neinn Jón Hreggviðsson né arfakóng.  Aftur á móti eigum við forseta, sem ekki er síður ferðafús en kotbóndinn á Rein forðum tíð og virðist auk þess telja sig til krýndra fursta.  Í það minnsta er nokkur hátignarbragur á forseta vorum og er það vel.  Það er nefnilega gott, þegar ekki þarf endilega vegsemd til að auka virðingu manna; stundum dugir vegleiðin ein.  Eða þannig.

En merkilegt er það, að í ljós hefur komið, að hinir þrír handhafar forsetavalds, þiggja árlega tíu milljónir króna fyrir að undirrita plögg meðan forsetinn ferðaglaði arkar um lönd og álfur.  Þetta skotsilfur, sem er langt yfir launum venjulegs launafólks, bætist ofan á bærileg laun, sem þetta fólk nýtur þess utan. 

Þessar aukaþóknanir handhafa forsetavalds, forseta hæstaréttar, forseta alþingis og forsætisráðherra dragast vel að merkja ekki frá launum forseta, enda þótt hann sér gjarnan í einkaerindum á sínu heimshornaflakki og ætti því með réttu, að vera launalaus á meðan.  En sjálf sagt þykir ekki kurteisi að ræða slíkt, né heldur hitt, að arfakóngi fylgir vitanlega arfaaðall, þótt sjálfskipaður sé.

Athugasemdir

[Ómar Ragnarsson, 17.8.2012 kl. 15:29]

Ég minnist þess sem einnar af fyrstu bernskuminningum mínum þegar það var "flaggað fyrir kónginum" á afmælisdegi hans. Þá var ég þriggja ára og eitthvað virðist svar afa míns hafa vakið athygli barnsins.

 Þessi hefð var upp runnin frá tímum einvaldskonunganna, enn er flaggað, og í gangi eru hinar fáránlegu seremoníur varðandi "handhafa forsetavalds" sem eru til komnar frá þeim tímum þegar konungurinn erlendis og enginn leið að hafa samband við hann.

Á okkar tímum nets og farsíma þegar tími einvaldskonunga er löngu liðinn er þetta allt orðið úrelt.

[Helga Kristjánsdóttir, 17.8.2012 kl. 15:35]

Hér finnast maurapúkar,sem láta kyrrt liggja þótt Jóhönnustjórn láti almenning greiða fyrir sérstaka pólitíska ásókn sína og fylgismanna með inngöngu í hnignandi stórveldi,auk alls þess sem því fylgir.

[Skattaþræll (IP-tala skráð) 17.8.2012 kl. 21:14]

Dæmi um rekstur ríkisfirirtækis Í DAG!!! ÞÚ borgar!

http://www.lin.is/lin/UmLIN/frettir/frett38.html