Álfheiður stígur krappan dans

Varast ber, að spara hugsun í kreppu.  Það er nefnilega ekki hægt að komast út úr henni, hugsunarlaust.  Að þessu mætti Álfheiður Ingadóttir heilbrigðisráðherra hyggja.

Nú hefur blessuð frúin fengið þá flugu í höfuðið, að skipa Náttúrulækningahælinu í Hveragerði, að draga saman seglin um sem nemur 46% af rekstrarkostnaði.  Í raun þýðir þetta lokun hælisins.  Og þar með atvinnuleysi á annað hundrað starfsmanna, sérstaklega kvenna með lág laun.

Á hverju ári dvelja tæplega 2000 manns á hælinu og er meðalaldur þeirra 64 ár.  Ríkið greiðir fyrir 120 rúm en tæplega 50 eru til viðbótar, þegar á þarf að halda, sem er oft, enda er biðtími 3 til 6 mánuðir.  Allir, sem á hælinu dvelja, hafa fengið til þess læknisvottorð.

Ýmsar ástæður liggja að baki dvalar á Náttúrulækningahælinu, s.s. eins og hjartveiki og  þunglyndi.  Hvað þunglyndissjúklinga varðar, er þess að geta, að þarna starfa þrír sálfræðingar og er þjónusta þeirra nýtt út í æsar.

Stór hópur gesta hælisins eru gamlar konur.  Það hafa orðið örlög margra þeirra, að ala upp sín börn og jafnvel að koma eiginmanninum til mennta.  Enginn hefur látið sig sorgir þeirra og þrár nokkurs varða.  Þessar gömlu konur leita sér gjarnan hvíldar á hælinu.  Þar njóta þær almennrar umönnunar starfsfólks og sálfræðiaðstoðar.  Og þarna hitta þær aðrar konur, sem eru í sömu sporum og þær. 

Margar þessara kvenna eru alþýðukonur.  Vera má, að þær hafi þegið þakklæti fyrir störf sín, en fjárhagslega hefur ekki verið mulið undir þær.  Framlag ríkisins, sem er 70% af kostnaði við hvern gest, er því forsenda þess, að þær geti þegið þá líkn, sem þarna er veitt.

Væri nú ekki ráð, að Álfheiður Ingadóttir sósíalistafrömuður, velti því alvarlega fyrir sér, á hverja hún er að ráðast með þessum niðurskurði sínum?

 

Athugasemdir

[Finnur Bárðarson, 10.6.2010 kl. 16:51]

Þetta fer að verða erfitt, það deginum ljósara að heilbrigðiskerfið og sér í lagi LSH eiga að taka á sig allan niðurskurði. Ekki eitt orð um lanbúnaðarráðuneytið eða utanríkisráðuneytið.

[Njörður Helgason, 10.6.2010 kl. 22:32]

Þetta er með ólíkindum hvernig framferði þessara flokkssystkyna er. Álfheiður úti á túni í öllum sínum málum. Jón á Hólum ætlar að berjast grimmt gegn breytingum á ráðherraskipan. Katrín Jakobsdóttir er á leið að fara að taka upp skólagjöld í framhaldskólum. Framundan er gríðarleg hækkun fyrir fólk sem sækir sér menntun.

[Eiður Svanberg Guðnason, 10.6.2010 kl. 22:47]

Álfheiður Ingadóttir hefur óvenjulega gott  lag á koma sér í klandur. Það gerist nánast í hvert einasta skipti,sem hún opnar munninn.

[Dingli, 11.6.2010 kl. 00:50]

Sæll Pétur

Hef ekki miklar áhyggjur af skólagjöldum upp á 50-100Þ. eða svo, enda bílaplön skólanna yfirfull og töluvert af glæsikerrum. Auðvitað eru þeir námsmenn til sem raunverulega eru staurblankir, en þeim mætti bjóða vaxtalítil lán fyrir skólagjöldum.

Þó Álfheiður hafi að hluta til borið þetta af sér í kvöld, þá held ég að ansi mörgum finnist sem hún ráði illa starfið.