Heimildarmynd um árásina á Goðafoss

Ríkissjónvarpið sýndi í kvöld fyrri þátt heimildarmyndar um kafbátaárásina á Goðafoss þann 10. nóvember árið 1944.  Að flestu leyti var þetta ágætur þáttur.  Nákvæmninnar vegna verð ég þó að leiðrétta það sem fram kom í upphafi hans, þegar gerð var grein fyrir styrjaldarstöðunni haustið 1944.  Þar var sagt, að Bandaríkjamenn hefðu sótt norður Ítalíu og var ekki annað að skilja, en þar hefðu þeir verið einir að verki.  Því fer þó fjarri.  Sókninn norður Ítalíu, sem hófst í september 1943 var sameiginlegt verkefni Breta og Bandaríkjamanna undir yfirstjórn breska marskálksins Harolds Alexander.  Reyndar tóku hermenn frá fleiri þjóðum þátt í sókninni.  Þannig voru það t.d. pólskir hermenn sem að lokum unnu sigur á Þjóðverjum í orrustunni um Monte Cassino, en það var harðasta orrusta þessarar sóknar. 

Að þættinum loknum kom auglýsing frá Eimskip og var þar sungið stef úr dægurlagi, sem hljómar svo: „Sértu velkominn heim, yfir hafið og heim".  Ég get ekki að því gert, að mér þykja þessi orð lítt við hæfi í þessu samhengi.  Árásin á Goðafoss var mannskæðasta styrjaldaratvikið í sögu Íslands, allar götur aftur til Sturlungaaldar.  Enn er á lífi fólk, sem á um sárt að binda vegna þessa.  Svona auglýsingaskrum særir.

Athugasemdir

[Ómar Ragnarsson, 26.12.2009 kl. 22:32]

Ég minnist þess enn að þegar þjóðin sat sem lömuð vegna þess að flugvélin Glitfaxi hafði horfið í aðflugi að Reykjavík og allar líkur voru á því að 20 manns hefðu farist var fyrir slysni leikið í útvarpinu söngur stúlkna á húsmæðraskóla þar sem þær sungu: "Vertu sæll, ég kveð þig, kæri vinur, og ást mín er horfin með þér."

Mjög margir tóku þetta mjög nærri sér.

Þá gerðist þetta hins vegar á versta hugsanlega augnabliki og því mun viðkvæmara en þegar auglýsingin var spiluð í gærkvöldi.

Ég hefði hins vegar talið að Eimskip hefðu annað hvort átt að sleppa þessari auglýsingu eða gera aðra.