Nokkur orð um grein Árna Sigfússonar

Í Morgunblaðinu í dag birtist grein eftir Árna Sigfússon bæjarstjóra í Keflavík, sem vert er að staldra við, þó ekki væri nema vegna þess, að enginn dregur í efa virðingu höfundar fyrir lýðræði.  Af tilefni, sem ástæðulaust er að rekja hér, líkir bæjarstjórinn þar saman McCarthyismanum í Bandaríkjunum og tortryggni manna í garð þeirra, sem störfuðu á vegum s.k. útrásarvíkinga.

Hér er ólíku saman að jafna.  McCarthyisminn beindist gegn skoðunum fólks, oftast  ranglega en tortryggni  fólks gagnvart meðreiðarsveinum útrásarvíkinga beinist að gjörðum manna. 

Vonandi er sá hópur ekki mjög stór, sem efast um að gjörðir útrásarvíkinga hafi verið glæpsamlegar, eða a.m.k. siðlausar með öllu.  Um það á ekki að þurfa að rökræða við stjórnmálamann.  Vonandi munu dómstólarnir taka á þeim málum með réttlæti og virðingu fyrir lögum og mannlegu samfélagi að leiðarljósi.  Tíminn verður svo að leiða í ljós, hversu harkalega verður gengið að meðreiðarsveinunum.  Vafalítið eru sumir þeirra sekir, aðrir saklausir.  En þar til Hrunið hefur verið leitt til lykta, er við hæfi, að þessir menn hafi hægt um sig. 

Athugasemdir

[Sigurður Þorsteinsson, 13.10.2009 kl. 12:06]

Pjetur, ætlar þú að ákveða hvaða menn eiga að hafa hægt um sig og hverjir ekki?

[Finnur Bárðarson, 13.10.2009 kl. 17:35]

Þeir eru að birtast einn af öðrum skjaldborgarmenn útrásarinnar. Það styttist greinilega í uppgjörið og jafnvel fótgönguliðarnir eru farnir að svitna. Það líkar mér.

[Hörður Halldórsson, 13.10.2009 kl. 21:23]

Fengið að láni frá "Guðbirni  Guðbjörnssyni (Eyjan.is)   "Sigurveldin voru fljót að átta sig á því, að allir Þjóðverjar, sem vettlingi gátu valdið, höfðu á einn eða annan þátt tekið þátt í að styrkja og viðhalda valdakerfi nasista. Enginn var svo saklaus, að hann eða hún gæti kastað fyrsta steininum, nema kannski hvítvoðungar.............  Til að auðvelda verkið var íbúum Þýskalands og Austurríkis skipt í fimm flokka:

1. Aðalsökudólgar/stríðsglæpamenn (Hauptschuldige/Kriegsverbrecher)
2. Sökudólgar (Belastete/Aktivisten, Militaristen, Nutznießer)
3. Minni háttar sökudólgar (Minderbelastete)
4. Meðsekir (Mitläufer)
5. Sýknaðir (Entlastete) ""               "Tilvitnun endar.        Margt af þessu fólki sem tók þátt í þessu útrásarævintýri eru  duglegt og vel menntað fólk sumt voru dúxar í sínum árgöngum.Við getum ekki ýtt öllu þessu fólki til hliðar,           nema úr flokki 1 og 2 Aðalsökudólgar og Sökudólgar.

[Ingibjörg Hinriksdóttir, 14.10.2009 kl. 18:00]

Hjartanlega sammála þér Pétur.