Grein Evu Joly - skyldulesning!

Grein sú, er Eva Joly birtir í dag í Morgnublaðinu, auk Aftenposten, Le Monde og Daily Telegraph ætti að vera skyldulesning, ekki aðeins á Íslandi, heldur í löndum Evrópusambandsins, eins og það leggur sig.  Sérstaklega er þetta þörf lesning fyrir Breta, Hollendinga og frændur okkar á hinum Norðurlöndunum.  Og ekki sakar, að frjálshyggjumenn lesi hana undir leiðsögn, jafn skilningsvana og þeir eru á efnahagsmál og raun ber vitni.

Ég ætla ekki að vitna í þessa grein hér, heldur velta fyrir mér nokkrum atriðum, sem þar eru tekin fyrir og öðru, sem málið varðar.

Sé það rétt, að Klakabjörgunarsamningurinn (Icesave samningurinn) geri ráð fyrir frekar greiðslum á hvern reikning, en þeim rúmlega 20.000 evrum, sem lög gera ráð fyrir, og það allt upp í 100.000 evrum og jafnvel meira, er auðsætt, að Alþingi á þann kost einan, að hafna samningnum.  Okkur ber skylda til að greiða, það sem lög gera ráð fyrir, annað ekki!

Allt bendir til þess, að Hollendingar og þó enn frekar Bretar fari offari gegn Íslendinum vegna hrunsins.  Það ber að gagnrýna.  En við megum aldrei gleyma því, hverjir lögðu snöruna um háls íslensku þjóðarinnar. Það voru ekki Bretar, ekki Hollendingar og ekki Alþjóða gjaldeyrissjóðurinn.  Það voru pólitískur boðberar s.k. frjálshyggju og braskaraskrílinn, sem þeir sömu menn afhendu bankakerfi þjóðarinnar á siflurfati!

Sú þjóð er ekki til, að hún þoli þá raun, að grundvallargildi hennar séu fótum troðin, án þess hún rísi til varnar.  Sú vörn er margþætt.  Það fyrsta, sem við verðum að gera, er að horfast í augu við það, sem gerst hefur og greina orsakir þess og afleiðingar.  Því næst verður að draga þá, sem ábyrgðina bera, hvort heldur um er að ræða forseta, stjórnmálamenn eða s.k. útrásarvíkinga, fyrir lög og rétt. 

Nú er vitað, að stór hluti glæpa þessa fólks var innan þess lagaramma, sem það hafði sjálft skapað og stuðlað að.  Eftir þeim lögum verður ekki dæmt, svo vit sé í.  Hér þarf að grípa til sömu aðgerða og Bandamenn gerðu gagnvart leiðtogum nasista eftir síðari heimsstyrjöld.  Allir vissu, að glæpir þeirra voru fyllilega í samræmi við þýsk lög; enda höfðu þeir sett þau sjálfir.  En menn sögðu einfaldlega sem svo; hér verður ekki dæmt eftir þeim lögum, sem glæpamenn hafa sjálfir sett, heldur út frá almennu siðgæði.  Og það var gert.  Allir vita hvað síðar gerðist.

Ég er ekki að mæla með því, að menn verði hengdir.  En þeir verða að taka út sína refsingu.  Að öðrum kosti getur enginn maður horfst í augu við eigin tilveru og sagt með stolti: Ég er Íslendingur!

Athugasemdir

[Finnur Bárðarson, 1.8.2009 kl. 14:40]

Þjóðin á greinilega a.m.k. einn vin.

[Gylfi (IP-tala skráð) 1.8.2009 kl. 17:32]

Greinin er góð, það er rétt, en það er aftur á móti rangt hjá Evu að samningurinn geri ráð fyrir greiðslum umfram 20.887 € lágmarksinnistæðurtryggingar. Þetta kemur skýrt fram í frumvarpi til laga um ábyrgð ríkisins á Icesave skuldinni. Ekki það að þetta er víst nógu mikið samt!

[Ingibjörg Hinriksdóttir, 1.8.2009 kl. 21:55]

Hjartanlega sammála þér.