Samfylkingin og lýðræðið eiga ekki samleið

Vestræn lýðræðisþróun hófst á kröfunni um ritfrelsi.  Umræðan, jafnt í ræðu sem riti er þannig grundvöllur lýðræðisins.  Krafa Samfylkingarinnar, flokks, sem nær ekki einu sinni þriðjungsfylgi þjóðarinnar, um að sótt verði um aðild að Evrópusambandinu þann 27. júlí n.k. og að málið verði keyrt í gegnum Alþingi á morgun er því árás á lýðræðið.

Það er í fyllsta máta ólýðræðislegt, að ætla að afgreiða þetta mál, án þess að vilji þjóðarinnar komi fram í þjóðaratkvæðagreiðslu, sérstaklega í ljósi þess, að  þrír fjórðu hlutar þjóðarinnar vilja almenna atkvæðagreiðslu um málið.  Offors Samfylkingarinnar í þessu máli ber þess vott, að flokkurinn hefur sagt skilið við þjóðina.  Slíkur flokkur dæmir sig sjálfur úr leik.

Við, sem aðhyllumst lýðræðislega jafnaðarstefnu tökum ofan og krossum yfir leiði hugsjóna okkar.  Ef að líkum lætur, verður rekunum kastað á morgun.  Nú er bara að vona, að í stjórnmálunum sé líf að loknu þessu.

Að lokum er vert að geta þess, sögulegs samhengis vegna,að helstu stuðningsmenn Evrópusambandsaðildar Íslands innan Samfylkingarinnar, eru gamlir félagar úr þeim armi Alþýðubandalagsins sálaða, sem blótaði því goði, sem nú situr á Bessastöðum, öllu trausti rúið, eftir að hafa farið með himinskautum og sungið „útrásarvíkingum" lof og prís.  Sagan hefur sína kímnigáfu; kaldhæðna á stundum.

Athugasemdir

[Bjarni Kjartansson, 15.7.2009 kl. 08:57]

Þennann pistil áttu nú Samfylkingamenn skilin svona sem Morgunandakt.

Skynsamlega fram sett og klár sannleikur.

Miðbæjaríhaldið