Almennar bætur marklausar varðandi Breiðavíkurmálið

Ríkisvaldinu ætlar að ganga treglega að gera upp mál sín við Breiðavíkurdrengina.  Í Morgunblaðinu í dag kemur fram, að forsætisráðuneytið vill ganga út frá almennum bótum og hækka þær allt að þrefalt. 

Því miður snýst þetta mál ekki aðalega um tölur, heldur siðferði.  Ef ríkisvaldið ætlar sér, að ganga út frá almennum reglum um bótakröfur, er það þar með, að draga úr sérstöðu þeirra afbrota, sem Breiðavíkurdrengirnir máttu þola.  Þeir liðu nefnilega ekki aðeins fyrir illa meðferð í Breiðavík, heldur einnig fyrir skort á eftirliti ríkisins með því, sem þarna fór fram.

Nú má vera, að slíkt hafi átt sér stað víðar.  Eigi að síður leyfa menn sér að vona, að slík meðferð sé sérstök; ekki almenn.  Því eru almennar bætur, eins þótt hækkaðar séu miðað við það, sem gengur og gerist, marklausar.

Handhafar ríkisvaldsins verða að gera sér ljóst, að hér var ekki aðeins um að ræða tímabundna illa meðferð á börnum; líf margra þeirra var lagt í rúst.  Fyrir slíkt verður að bæta sérstaklega, að svo miklu leyti, sem fyrir það verður bætt.

Athugasemdir

[Margrét Sigurðardóttir, 12.7.2009 kl. 23:39]

Algjörlega sammála þér.

[Valsól (IP-tala skráð) 13.7.2009 kl. 09:18]

Það má segja þessari ríkisstjórn til tekna umfram stjórn Sjálfstæðisflokksins, að forsætisráðherra hafði manndóm í sér að biðja þessa menn afsökunar. Geir hafði það ekki í sér, kannski að hroki Sjálfstæðismannsins hefur borið hann ofurliði. Ég veit það ekki?