Morgunvaktin á Rás 1 - til varnar menningunni

Ríkisútvarpið, Rás 1 er menningarfyrirbæri, að vísu ekki gallalaust, en menningarfyrirbæri eigi að síður.  Bylgjan lágmenningarstöð, að svo miklu leyti, sem hægt er að orða hana við menningu.  Rás 2 á Ríkisútvarpinu er þarna á milli. Samkvæmt frétt í Morgunblaðinu í dag, bls. 28, hefur dagskrárstjórn Rúv í hyggju að breyta morgunútvarpi Rásar 1.

 

Morgunvaktin á Rás 1 hefur lengi verið til fyrirmyndar.  Það flytur fréttir og fréttatengt efni, frá klukkan 7.00 og þar til KK tekur við með þægilegan tónlistaþátt á léttum og ljúfum nótum.

 

Útvarpsrás og boð við Rás 1, verður að byggja á hefðum, það kallast rótfesta, sem er undirstaða mennningar.  Að ætla að breyta morgunútvarpi einu vitsmunaútvarpsstöðvar landsins, til að "keppa" við lágkúrufyrirbæri eins og Bylgjuna, svo sem nú virðist standa til, er skortur á siðmenningu.

 

Fólk sem fær svona hugmyndir og er í aðstöðu til að koma þeim í verk, ætti endilega að huga að því, að fá sér aðra vinnu.

Athugasemdir

[Eiður Svanberg Guðnason, 17.6.2009 kl. 10:27]

Sammála þér, Pjetur, um Morgunvaktina á Rás 1. Margt mjög  gott um hana. Ég  skil  ekki  hversvegna er  verið að  breyta  því  sem  er gott og gengur vel. Það er eins og að gera við eitthvað sem ekki  er bilað.

[Stjörnupenni, 17.6.2009 kl. 11:55]

Puh! Hver þykist þú vera að ákveða hvað er hámenning og hvað er lágmenning?

[Pjetur Hafstein Lárusson, 17.6.2009 kl. 12:51]

Íslensk menning hefur lengi liðið fyrir það, að menn gera ekki greinarmun á grundvelli menningar/sígildri menningu, annars vegar og dægurmenningu/lágmenningu, hins vegar.  Þetta er rétt eins og í stjórnmálum, þar sem ekki er gerður greinarmunur á aðalatriðum og aukaatriðum.  Við sjáum hvert það hefur leitt þjóðina.