Hver vinnur hjá hverjum?

Allir stjórnmálaflokkar eiga sér lítil sæt lukkutröll, sem þeir láta fara eins vel um og kostur er.  Oftast eru þau dúðuð inn í mjúk störf á vegum almennings, hvort heldur er ríkis eða sveitarfélaga.  Þess er þá jafnan gætt, að vinnan sé hófleg en launin þar í móti lítt skorin við nögl.

Nú hefur Einar Karl Haraldsson verið ráðinn sem eins konar upplýsingafulltrúi Landspítalans.  Starfið var ekki auglýst laust til umsóknar og ekki er alveg ljóst, í hverju það er fólgið. 

Að þessu tilefni ræddi fréttastofa Ríkissjónvarpsins við þá mætu konu, sem gegnir stöðu forstjóra Landspítalans, nú í fréttum klukkan 19.00.  Þegar fréttamaður spurði forstjórann um laun Einars Karls, var svarið stutt og laggott:„Ég ræði aldrei laun starfsmanna minna opinberlega".

Ekki er vitað til þess, að blessuð konan sé eigandi Landspítalans; hún er einfaldlega starfsmaður hans, rétt eins og ræstingarkonur, læknar og annað starfsfólk spítalans.  Sama gildir um Einar Karl Haraldsson.  Launamál hans eru því ekki einkamál, heldur mál almennings; eiganda Landspítalans.