Vísukorn um Bjarna Harðarson

Bjarni Harðarson bóksali á Selfossi er hinn mætasti maður, enda þótt hann hafi um tíma verið Framsóknarmaður.  Slík yfirsjón fyrirgefst sumum, þ.á.m. honum.  Þó þótti mér nokkuð langt gengið í morgun, þegar ég var staddur í bókabúðnni hans og heyrði hann kallaðan sóma Suðurlands.  Af því tilefni varð til eftirfarandi vísa:

 

Sómi telstu Suðurlands,
Skagfirðingur hálfur.
Enda nokkuð beggja blands,
- bústólpi og álfur.

Athugasemdir

[Þorvaldur Sigurðsson (IP-tala skráð) 1.5.2009 kl. 00:04]

Hvernig var aftur reglan um stuðlasetningu með sk?

[Hildur Helga Sigurðardóttir, 1.5.2009 kl. 10:28]

Trúi ekki öðru en að Bjarni verði sáttur við þessa.

Tala af reynslu um það að ekki er verra að vera "Skagfirðingur hálfur".

Það er svo aftur spurning hvor helmingurinn er bústólpi og hvor álfur ?

Og hvor er betri helmingurinn ?   Nema báðir séu...

[Hilmar Hafsteinsson (IP-tala skráð) 1.5.2009 kl. 11:03]

Sómapiltur Suðurlands,

sveitamaður ljótur.

Mjaðaryndi beggja blands,

brattur flækjufótur.

[Árni Gunnarsson, 1.5.2009 kl. 11:41]

Tek undir með Þorvaldi.

[Rótari (IP-tala skráð) 1.5.2009 kl. 13:16]

Mæli með því að bæði Pétur sjálfur og Hilmar Hafsteinsson hitti Árna Gunnarsson og setjist við fótskör hans og læri stuðlasetningu og önnur helstu atriði íslenskrar bragfræði. Annað hvort er fyrir fólk að yrkja eftir þessum tiltölulega einföldu grunnreglum, eða halda sig við aðferðir Þorsteins Eggertssonar og Bubba Morthens.

[Pjetur Hafstein Lárusson, 1.5.2009 kl. 14:52]

Aumt er að vera staðinn að slíkri bragfræðilegri villu, að jaðri við Steina Eggert og Bubba Mortheins.  Ég biðst forláts.

[Hilmar Hafsteinsson (IP-tala skráð) 1.5.2009 kl. 18:03]

Álfur, varla beggja blands,

bústólpi á þingi.

Hálfur sómi Suðurlands

snýst í tóma hringi.