Svo bregðast krosstré, sem önnur tré

Jónas Jónasson er einn þeirra útvarpsmanna, sem ég hef nokkurt dálæti á.  Þess vegna hlakkað ég mikið til, að hlust á nýjan þátt hans, Sumarraddir, en hann hóf göngu sína í morgun.  Og ég varð ekki fyrir vonbrigðum; þar til í lokin.  Þá kvaddi Jónas okkur hlustendur með eftirfarandi orðum: Hafið þið góðan dag.

Þetta er ekki íslenska, heldur yfirfærð enska, s.k. ísenska.  Englendingar kveðjast gjarnan með orðunum; have a good day.  Það er þeirra háttur.  Við kveðjumst með öðrum hætti, s.s. að segja verið þið sæl, svo aðeins einn möguleiki af mörgum sé nefndur.

Ég hlakka til að hlusta á næsta þátt Jónasar og vænti þess, að hann kveðji mig að aðra hlustendur á óbjagaðri íslensku.  Ekki skortir hann hæfnina til þess.

Athugasemdir

[Bergur Thorberg, 27.4.2009 kl. 08:07]

Já, betra hefði verið að segja "eigið þið góðan dag", eða bara eitthvað allt annað eins og þú segir. Kveðja.

[Pjetur Hafstein Lárusson, 27.4.2009 kl. 10:21]

Bergur, "eigið þið góðan dag" er ísenska, rétt eins og "hafið þið góðan dag".  Við Íslendingar kveðjum (í fleirtölu) með því að segja, verið þið sæl, sæl að sinni o.s.frv.

[Þorsteinn Briem, 27.4.2009 kl. 12:11]

Rétt hjá þér, Pjetur minn.