Háskólagengnir en menntunarlausir?

Í Morgunblaðinu í dag er haft eftir framkvæmdastjóra Samtaka starfsmanna fjármálafyrirtækja, að reyndir bankamenn hafi vikið fyrir „vel menntuðum en reynslulitlum karlmönnum".    Hér er hann ekki síst að tala um þau 5% bankamanna, sem tilheyrðu ofurlaunaliði bankanna eftir einkavinavæðinguna.  En eru þessir menn vel menntaðir?

Auðvitað er að mörgu að hyggja, áður en slíkri spurningu verður svarað.  Máltækið „margur verður af aurum api" á jafnt við um menntamenn sem aðra.  Engu að síður eru afglöp „gulldrengja auðhyggjunnar" svo stórkostleg, að draga verður menntun þeirra í efa.  „En hvernig er það hægt, þeir hafa sínar prófgráður?", veit ég að margur segir.

En þá er að því að hyggja, að hið svo kallaða „háskólasamfélag" hefur þanist út á undanförnum árum.  En grunur minn er sá, að sú útþensla eigi við um magn en ekki endilega gæði.  Háskólar spretta upp eins og gorkúlur.  En vitanlega eru þeir ekki jafnir að gæðum.  Og því skyldu menn ekki gleyma, þegar rætt er um „unga og vel menntaða bankamenn", að  hagfræði byggist á hugmyndafræði, ekki menntun, eins þótt hún sé kennd í háskólum.  Urðu menn kannske varir við þekkingu hjá málpípum s.k. „greiningardeilda" bankanna?  Tæpast, enda voru þetta í raun aðeins ósköp venjulegar auglýsingastofur.

Ástæðulaust er að efast um, að ýmsir í liði „gulldrengjanna" hafi gert sér grein fyrir, hvert efnahagslíf þjóðarinnar stefndi.  En þá skorti hugrekki til að segja sannleikann.  Mér finnst eins og greina megi viss líkindi með þeim og ýmsum þýskum herforingjunum, sem þjónuðu Hitler, þótt þeir vissu, að hann gæti aldrei unnið stríðið.  Þeir flutu einfaldlega með fjöldanum, vegna þess, að þeir voru huglausir. 

Nú verður að játa, að þýskur herforingi á tímum Hitlers gat átt von á því, að fjölskyldu hans yrði útrýmt ef hann segði sannleikann.  Það þurftu „gulldrengir´" íslensku bankanna ekki að óttast.  Þeir þorðu einfaldlega ekki að skera sig úr þeim hópi, sem þeir tilheyrðu.  Heigulsháttur þeirra er því takmarkalaus.

Því miður á þetta við um fleiri á okkar tímum.  það er eins og svo ótrúlega margir sæki sér misskilda „virðingu" í að samlagast fjöldanum.  Ef til vill var það þetta múgeðli, sem lagði grunninn að kreppunni.  Afleiðingin er sú, að menn þekkja ekki muninn á asna og gæðingi.

 

Athugasemdir

[Gullvagninn (IP-tala skráð) 15.2.2009 kl. 12:24]

Þetta er alveg rétt hjá þér.  Það eru til menn sem telja að næsta hrun verði í menntageiranum, þegar þjóðfélagið gerir sér grein fyrir því að menntaiðnaðurinn skilar magni en ekki gæðum, að fólk kemur út með prófgráður og er ómenntað í klassískum skilningi þess orðs.  Það er iðnmenntað, þó það hafi master eða doctorsnafnbætur.

[Kolbrún Hilmars, 15.2.2009 kl. 15:58]

Pjetur, þú nefnir þarna "hámenntaða fræðinga"  nýlega útskrifaða úr háskólunum - væntanlega íslenskum.  Þeirra prófgráður hafa fallið að gildi og komið óorði á allan hópinn, hvort sem það er verðskuldað eður ei.

Það sem veldur mér meiri áhyggjum en þessir tilteknu fræðingar er staða kennaranna.  Eru kennararnir þeirra þessir sem nú skrifa hver um annan þveran gáfulega pistla um hvernig leysa eigi fjármálakrísuna?