Vörn á vitlausum stað

Í dag birtist í Fréttablaðinu grein eftir Bjarna Ármannsson fyrrum forstjóra Glitnis.  Var þar um að ræða undarlegt sambland játningar og frávísunar á þætti hans í hruni íslensks efnahagskerfis.  Í framhaldi af grein þessari birtist svo viðtal við Bjarna í Kastljósi í kvöld.  Það verður að segjast eins og er, að þáttarstjórnandi, Sigmar Guðmundsson gekk þar mjög hart að Bjarna.

Ástæðulaust er að fjalla ítarlega um greinina eða viðtalið.  Ástæðan er einfaldlega sú, að einungis dómstólar eru hinn rétti vettvangur þessara mála.  Þar á að gefa Bjarna Ármannssyni og öðrum, sem að efnahagshruninu koma, tækifæri til að endurheimta æru sína.  Takist það ekki, er hún þeim einfaldlega glötuð, eins og allt það, sem kastað hefur verið á glæ í mammonsæði undanfarinna ára.

Athugasemdir

[Sverrir Einarsson, 6.1.2009 kl. 21:40]

Bjarni er eins og allir Hringrásarvíkingarnir, fastur í því að það var kerfið sem virkaði ekki og þeir því ekki ábyrgir fyrir þessu sama kerfi sem þeir hönnuðu.

Þeir jú hönnuðu þetta kerfi og kerfið brást. Á honum var að heyra að þá bæri kerfið ábyrgðina ekki hönnuðurnir.

Eitthvað er Bjarni að reyna að fela því hann kom aldrei þessu vant fram með nýja hárgreiðslu og gleraugnalaus. Ekki vatnsgreiddur með "gáfumannagleraugu" og sakleysislúkkið. Er hann að reyna að skapa nýja ímynd af sér. Ja svei honum.....betra að hann væri bara í Noregi og héldi kjafti þar en að koma og reyna að hvítþvo sig með því að koma í fjölmiðla og segjast hafa skilað einhverjum milljónum, sem hann munar hvort eð er ekkert um enda með rúma 6 milljarða í veskinu eftir að hann arðrændi Glitnir.