Sendiherraskipun við Rauðará

Menn eiga að sýna vinum sínum ljúflyndi.  Því er gott til þess að vita, að Ingibjörg Sólrún Gísladóttir utanríkisráðherra, skuli hafa skipað vinkonu sína sendiherra.  Að vísu starfar hún sem skrifstofustjóri í ráðuneytinu, en væntanlega er það nokkurt ferðalag, að fara þangað frá heimili hins nýja sendiherra og það á hverjum degi.

Sjálfum er mér tíðförult yfir Hellisheiði.  Ég er því nokkuð viss um, að ég verð orðinn sendiherra á heiðinni áður en langt um líður.  Af augljósum ástæðum er ég að vísu ekki vinkona utanríkisráðherra; það skal játað.  En ég er viss um, að blessuð konan setur ekki svoleiðis smámuni fyrir sig, jafn víðsýn og hún er.

Athugasemdir

[Sverrir Einarsson, 28.11.2008 kl. 12:22]

Pjetur HA HA HA þú sendiherra á Heiðinni þá verð ég um leið sendiherra í Þrengslunum með þorlákshöfn sem þý. Ég ek þarna á hverjum sólarhring.

Fyrr held ég samt að pípurnar frá ofninum í neðra þagni á Hengilssvæðinu.

Ég las (eða heyrði viðtal, man ekki hvort) við ISG og tónninn í því var að það væri svo fátt um fína drætti í mannskap við hægi í sendiherrastöðuna að hún varð að skipa þessa frú í það embætti.....hvar er niðurskurðurinn sem hún var að boða og aðhaldið, var það bara tómt kjaftæði?

Mín vegna máttu vera sendiherra Hveragerðis í tjöruborg,  nú eða sendihrerra tjöruborgar í Hveragerði. Treysti þér til að velja skárri kostinn.

[Smjerjarmur, 29.11.2008 kl. 00:54]

Vita menn nema konan sé vel að stöðunni komin?  Mér finnst þetta vera óttalegt jarm.  Reyndar svolítill smjerklípustíll á þessu.