Hollenskir viðskiptavinir Icesave leita aura sinna

Ég var ekkert tiltakanlega stoltur af þjóðerni mínu, þegar ég horfið á fréttirnar í Ríkissjónvarpinu áðan.  Þar var rætt við nokkra Hollendinga, sem komnir eru til Íslands, til að freista þess, að hafa upp á þeim pengingum, sem þeir lögðu inn á reikninga Icesave.

Miðaldra kona, sem rætt var við, hafði selt húsið sitt, til að kosta háskólanám þriggja barna sinna.  Hún fól Icesave ávöxtun fjársins.  Allir vita hvernig það fór.  Einnig var spjallað við ungan mann sem hafði selt fasteign og lagt inná reikning Icesave, þaðan sem hann ætlaði að taka þá aftur, og reisa sér nýtt hús. Nú er innistæðan horfin og ekkert til að greiða iðnaðarmönnum fyrir byggingu nýja hússins. Þá var talað við mann, sem lagði stórfé inn á reikninga sama banka.  Það fé átti að renna til uppbyggingarstarfs í þágu fátækra í Kenýa.  Allt horfið!

Og svo koma íslenskir stjórnmálamenn, og tala um Hollendinga og Breta, nánast sem fjárkúgara, vegna þess, að þeir skuli voga sér að krefjast þess, að íslenska ríkið greiði skuldir íslensks banka, sem rekinn var á ábyrgð íslenska ríkisins.  Þurfum við ekki að staldra ögn við?! 

Athugasemdir

[Bumba, 12.11.2008 kl. 00:54]

Sæll. Þetta er ótrúlegt hvernig firringin í íslenzku samfélagi er. Ótrúlegt. Ég er orðinn svo undrandi og tættur af að hugsa um þetta. Hluztaði á þátt í morgun í hollenzka ríkisútvarpinu og þá var búið að taka saman upphæðina sem hvarf í þessum Icesave eða hvern fjandann sem þetta nú hét. 30 milljarðar evra eru gufaðar upp. Er þetta satt? Sé þetta rétt þá held ég að það sé mál til komið að halla sér. Með beztu kveðju.

[Jón Gunnar Bjarkan, 12.11.2008 kl. 08:50]

Já þetta var dálítið sjokk að sjá þetta í fréttunum. Þarna var verið í fyrsta sinn að persónugera þetta fólk sem bankamennirnir okkar féflettu. Maður væri illa brjálaður ef dæmið hefði verið snúið við og íslendingar rændir á þennan hátt.

En hvað getur maður eiginlega sagt? Við getum bara einfaldlega ekkert borgað. Við á mælikvarða Davíðs Oddssonar, óreiðumenn, því hann lærði það hjá ömmu sinni að menn sem ekki borga skuldir sínar séu óreiðumenn. 

Ég verð nú bara að viðurkenna að maður er farinn að hallast meira og meira á þá skoðun að ríkisstjórnin verði einfaldlega að fara heimta eitthvað af þessum peningum til baka með upptöku eigna á þessum milljarðamæringum, hvar í andskotanum eru þessir peningar eiginlega.