Næturdagskrá Ríkissjónvarpsins

Í gærkvöldi sýndi Ríkissjónvarpið ágætan þátt um mótun kínverska keisaradæmisins skömmu fyrir árið 200 fyrir Krists burð.  M.a. var þar sagt frá tilurð „leirhersins" og byggingu Kínamúrsins.  Vissulega er þakkarvert, að slíkt efni skuli sýnt í sjónvarpinu.  Hitt er öllu lakara, að sýningin hófst um kl. 23.00.  Ég gafst upp tæpri klukkustund eftir miðnætti.

Nú veit ég ekki, hvað var í sjónvarpinu fyrr um kvöldið, geng bara frá því sem gefnu, að það hafi verið sama ameríska lágmenningavellan og vant er, að undangengnu Kastljósi skuggans.  Það er nefnilega svo undarlegt, með þá hjá Ríkissjónvarpinu, að þeir virðast halda að úrvalsefni, hvort heldur um er að ræða kvikmyndir eða þætti, sé engum öðrum ætlandi að horfa á en nátthröfnum einum.  Mér er spurn, heldur dagskrárstjóri Ríkisjónvarpsins, að þroskandi sjónvarpsefni sé hluti af samkvæmislífinu?

Athugasemdir

[Lýður Pálsson, 26.9.2008 kl. 10:03]

Sæll Pjetur. Já ég var farinn að dorma yfir myndinni undir það síðasta. Hélt þó út. En þetta er ein besta heimildarmynd sem ég hefi séð í langan tíma. Og RUV hefur lagt metnað sinn í að sýna góðar heimilda- og fræðslumyndir.  Þessi mynd var annars ekki barnaefni - sýndi grimd - og það skýrir etv. hversu seint hún á dagskrá var sett. kv. Lýður

[Sverrir Einarsson, 26.9.2008 kl. 12:17]

Ef ég mætti ráða, þá væri allt gott sjónvarpsefni sýnt á milli 9 og 12 á daginn.

Það er sá tími sem ég hef til að horfa á sjónvarp (svona almennt), minn vinnutími er nefnilega á nóttunni (felst meðal annars í því að læðast um Hveragerði)

En hverju fæ ég ráðið í þessum heimi?????

[Sæmundur Bjarnason, 26.9.2008 kl. 16:42]

Hmm. Minn vinnutími er líka á nóttunni en á morgnana sef ég. Líka þegar ég á frí. Þannig að tíminn 9 - 12 hentar mér ekki. Fellst heldur ekki á að allir sem eru vel vakandi um miðnættið séu endilega nátthrafnar. Held nefnilega að það sé fleira sem fram fer um það leyti en samkvæmislíf.