Enn um Breiðavík

Við Íslendingar höfum lengi talið okkur trú um, að við búum í stéttlausu samfélagi, a.m.k. í þeirri merkingu, að allir hafi jöfn tækifæri til að leita sér frama, hverrar ættar sem þeir eru.  Nú jæja, sæll er hver í sinni trú.  En hvernig fær þessi stéttleysistrú staðist, þegar við leiðum hugann að Breiðavíkurmálinu?  Voru margir ráðherrasynir vistaðir þar?  Eða jafnvel bara afkomendur ráðherra, embættismanna eða annarra pótintáta, segjum í þriðja lið?  Ég veit það ekki, en það væri fróðlegt, að fá þetta upplýst.

Annars verð ég að viðurkenna, að nú berast góðar fréttir af þessum málum.  Því sama ríkisvaldi og rak kvalræðisbúðirnar í Breiðavík hefur tekist að punga út 19.000.000 króna í einhverja nefndarmenn, sem kanna eiga hugsanlegar bótagreiðslur til fyrrum barnafanga í Breiðavík. 

Það er gott til þess að vita, að einhverjir uppskeri laun erfiðis síns.  Já, og áður en gleymist, skyldu Breiðavíkurdrengirnir eiga fulltrúa í þessari nefnd?

Athugasemdir

[Páll Rúnar Elíson, 11.9.2008 kl. 21:56]

Sæll.  Það held ég ekki og ætti ég að vita það. Verðum nú samt að gefa þeim tækifæri á að ljúka þessu máli og dæma svo.