Breiðavíkurmálið

Ber Geir Haarde, umfram aðra,  ábyrgð á þeirri hrottalegu meðferð, sem Breiðavíkurdrengirnir máttu þola á árum áður?  Vissulega ekki.  En ber það ríkisvald, sem sá hinn sami Geir Haarde fer fyrir nokkra ábyrgð í þeim efnum?  Því miður ber það alla ábyrgð.  Það sem gerðist í Breiðavík var nefnilega á ábyrgð ríkisvaldsins, fyrir tilstuðlan þess og undir stjórn þess.  Og þar eð Ísland er lýðræðisríki, ber þjóðin sjálf alla ábyrgð á því sem ríkisvaldið hefst að eða lætur ógert.  Forysta ríkisvaldsins er kosin af fólkinu sjálfu.  Ábyrgð þeirra sveitarfélaga, sem sendu varnarlausa drengi í þessar pyntingarbúðir, er svo sér kafli út af fyrir sig.

Því eru þessi þungu orð látin falla hér, að forsætisráðuneytið afhenti félagi Breiðavíkurdrengja vinnuplagg, þar sem fram koma hugmyndir ríkisvaldsins um bætur til handa þeim vegna dvalarinnar í Breiðuvík, og þess, er þeir máttu þola þar.  Látum hugmyndir ráðuneytisins um bótaupphæðina liggja milli hluta.  En Breiðavíkurdrengjunum þótti ástæða til, að þjóðin kynntist þessum hugmyndum, þrátt fyrir, að ráðuneytið hefði kynnt þeim þær í trúnaði.  Og þá vakna tvær einfaldar spurningar, annars vegar sú, hver í raun ráði lýðræðisríki, stjórnmálamenn og embættismenn eða fólkið sjálft?  Hin spurningin er þessi; gátu fulltrúar ríkisvaldsins farið fram á trúnað þeirra sömu manna og þetta sama ríkisvald hafði, jafnvel árum saman haldið í pyntingarbúðum? 

Geir Haarde, ég hef enga ástæðu til að draga í efa drengskap þinn.  En hugsaðu málið; ríkisvaldinu var á sínum tíma trúað fyrir þessum drengjum, þó reyndar aðeins af sjálfu sér.  Þeim trúnaði brást það.  Hvaða trúnaðar getur það nú krafist af sínum eigin fórnarlömbum?

Athugasemdir

[Halla Rut , 6.9.2008 kl. 12:17]

Þetta er einmitt eins og ég sá þetta. Hann (Geir) ætlast til trúnaðar af þeim sem ríkið sem hann nú stýrir braut svo á.

Það er nú því miður ekki aðeins í þessu máli sem við sjáum svo skýrt hve Geir og margir hans félagar í ríkisstjórninni finnst hinn almenni borgari skipta litlu máli. Nú finnst Geir Haarde t.d. að okkur komi ekki við hve háir vextir eru á láninu sem VIÐ vorum að taka. 

Það hefur engin gott af því að vera við völd of lengi því það virðist einhvernvegin taka manneskjuna úr fólki.

[Gulli litli, 7.9.2008 kl. 09:32]

Í svona málum er allur trúnaður beinlínis hættulegur..Hér á allt að vera á yfirboðinu..