Enga virkjun í bakgarði Hvergerðinga!

Undanfarið hefur verið deilt um það, milli Hvergerðinga og Ölfusinga, eða réttara sagt Þorlákshafnarbúa, hvort reisa eigi gufuaflsvirkjun sneinsnar frá Hveragerði, nánar tiltekið 5 km frá bænum.  Ljóst er, að viðkomandi landsvæði er í eigu Ölfusinga og lagalegur réttur til framkvæmdanna því líklega þeirra.  Hitt er og víst, að á þessu svæði býr ekki einn einasti Ölfusingur, en hinn fyrirhugaði virkjunarstaður er, eins og að framan segir, sneitnsnar frá Hveragerði.  Við sem þar búum, teljum okkur því hafa fullan siðferðislegan rétt, til að mótmæla þessum fyrirhuguðu virkjunarframkvæmdum. 

Ég hef búið í Hveragerði síðan árið 1998.  Ferðir mínar til Reykjavíkur eru nokkuð tíðar.  Og það fer ekkert milli mála, að virkjunaframkvæmdir á Hellisheiði hafa stóraukið mengunina þar um slóðir.  Það verður tæpast svo farið yfir heiðina, að fnykinn beri ekki yfir, bæði vestan og austan Skíðaskálabrekkunnar, sem áður var eini staðurinn, þar sem fýlunnar gætti.  Það er því hverjum manni ljóst, að Hvergerðingar yrðu að gjalda dýru verði, þann gróða, sem Þorlákshafnarbúar telja í augsýn, verði af þessum virkjunum.

Ég lít svo á, að allt landnám Ingólfs, og rúmlega það, sé í raun eitt byggðarsvæði.  Hér á ég við landsvæðið frá Borgarnesi og austur að Þjórsá.  Í raun ætti þetta að vera eitt sveitarfélag.  En það er aðeins framtíðarvon.  Hitt er svo annað mál, að menn geta ekki leyft sé, að tæma ruslatunnur sínar í garði nágrannans.  Það er nákvæmlega það, sem þetta mál snýst um, sama hver þinglýstur eigandi garðsins er.

Athugasemdir

[Hafsteinn Viðar Ásgeirsson, 23.11.2007 kl. 23:40]

Hjartanlega sammála varðandi Bitruvirkjun og ég veit að ég er ekki einn um það hér í Þorlákshöfn.

[Sædís Ósk Harðardóttir, 23.11.2007 kl. 23:48]

Þetta er bara hræðlegt til umhugsunar.  Vonandi sjá menn að sér og hætta við þessar framkvæmdir.

[Lára Hanna Einarsdóttir, 24.11.2007 kl. 01:02]

Hvergerðingar hafa mikilla hagsmuna að gæta. Ég hef verið að reyna að berjast gegn Bitruvirkjun skrifa um málið og á orðið talsvert samsafn af upplýsingum.

Er ekki hægt að virkja íbúa Þorlákshafnar til að stöðva bæjarstjórann, Hafsteinn? Hann er eins og þrjóskur krakki, ákveðinn í að fara sínu fram hvað sem hver segir og hversu gríðarlegur sem skaðinn verður.

Skoðið bloggið mitt og vefsíðuna www.hengill.nu.