Góðviðrisganga um Vesturbæinn

Sem mér varð gengið vestur í bæ í dag, sá ég, að verið er að byggja hryllingshús norðan við Naustið og kemur það til með að gnæfa yfir nánasta umhverfi til suðurs.  Reyndar eru svona slys að gerast út um alla borg, og í nágrannabyggðum hennar.  Peningamenn vaða áfram á skítugum skónum og eru á hraðri leið með að gera ásýnd Reykjavíkur og nágrennnis að amerískri skrípamynd. 

En lóðabraskið er ekki nóg fyrir þessa herramenn.  Nú virðast þeir ætla að leggja undir sig orkustofnanir þjóðarinnar.  Þjónustufyrirtæki í eigu almennings verða þá gróðafyrirtæki, þar sem hagnaður hluthafanna skiptir máli og annað ekki.  Skítt veri með þarfir almennings.

Og hvað gera þeir almannafulltrúar, sem kallast stjórnmálamenn?  Þeir gera nákvæmlega ekki neitt!  Það mætti halda, að þeir telji sig hafa verið kosna, til þess eins, að halda skálaræður hver yfir öðrum.  Til að kóróna svo ósvífnina talar forseti lýðveldisins fjálglega um nauðsyn þess að jafna tekjur landsmanna í þingsetningarræðu, rétt áður en hann stígur upp í einaþotu eigenda Eimskips og heldur í Kína í opinberum erindum. 

Samkvæmt tillögum fjármálaráðherra á ríkisstjóður að skila tugmiljarða hagnaði á næsta ári.  Á að nota þá peninga til að jafna tekjur landsmanna?  Nei, ekki aldeilis; það á að lækka skatta, safna til mögru áranna eða eitthvað í þá áttina.  Lækka skatta hverra?  Væntanlega þeirra, sem nóg eiga fyrir, það er vaninn.  Og svo skilja stjórnmálamenn það ekki, að þeir séu af fáum virtir!

Athugasemdir

[Kári Harðarson, 4.10.2007 kl. 06:26]

Heyr heyr!  Nákvæmlega svona upplifi ég flæðiskerið þessa dagana.