Um Gjábakkaveg

Stundum er eins og það séu ekki aðeins vegir Drottins, sem eru órannsakanlegir, heldur einnig vegir Vegagerðarinnar.  Þannig eru hugmyndir hennar um Gjábakkaveg lítt skiljanlegar.  Til hvers þarf að leggja þarna hraðbraut með 90 km hámarkshraða?  Já, og hvers vegna þarf að færa veginn nær Þingvallavatni, þannig að hann liggi meira að segja að hluta innan þjóðgarðs?

Fréttablaðið birtir í dag mótmæli fimmtán líffræðinga, sem margir hverjir hafa sérstaklega helgað sig rannsóknum á Þingvallavatni.  Reyndar eru mótmælin ekki alveg ný, heldur frá því í vor.  Þegar blaðið ber þessi mótmæli undir framkvæmdastjóra Vegagerðarinnar, svarar hann, að öllum hagsmunaaðilum hafi verið svarað vegna málsins, en ekki sé hægt að svara öllum þeim, sem hafa álit á málinu.

Þetta er að vísu nokkuð sköruglega mælt, en skilur þó eftir fleiri spurningar en svör.  Hverjir eru hagsmunaaðilar, þegar lífríki sjálfs Þingvallavatns er í veði?  Er það ekki þjóðin?  Og með leyfi, er hægt að hafa að engu álit færustu vísindamanna landsins varðandi þetta merka svæði?  Svari hver fyrir sig.

Athugasemdir

[Hermann (IP-tala skráð) 30.8.2007 kl. 18:59]

Hvers vegna???

1. lagi, þarna fara um 90% túrista sem að koma til landsins, og það á bara eftir að aukast ef að Þingvellir fara á heimsmynjaskrá

2. lagi, það er mjög algengt að það verði slys á þessari leið, og hann er lokaður hálft árið,

3. lagi, þetta eru innansveitarsamgöngur, þarna ætti með réttu að fara skólabíll á hverjum degi á Laugarvatn, ekki hægt vegna ófærðar og vegleysu,

Hermann Geir Karlsson, Laugarvatni