Útvarp Suðurlands blásið af

Undanfarin fjögur ár hefur Ríkisútvarpið rekið svæðisútvarp á Suðurlandi.  Hefur það flutt fréttir og annað efni úr fjórðungnum, fjórum sinnum í viku, hálftíma í senn.  Nú hefur verið boðuð breyting á.

Einhver kynni að ætla, að Ríkisútvarpið hefði þann metnað, að breytingin yrði til bóta, dagskráin yrði t.d. lengri og flutt á hverjum degi.  En það er nú eitthvað annað.  Nú skal spara.  Fréttamaður útvarpsins á Selfossi, sem annast hefur efnisval í svæðisútvarpið, verður í raun því sem næst fréttaritari. 

Óneitanlega er þetta nokkuð í samræmi við þá þróun hjá fjölmiðlum hér á landi, að vera ekki íslenskir heldur reykvískir.  En þá er best að stíga skrefið til fulls, leggja niður Ríkisútvarpið og stofna þess í stað Borgarútvarp.  Það yrði þá að sjálfsögðu rekið alfarið á kostnað Reykvíkinga.

Athugasemdir

[Ásgeir Kristinn Lárusson, 27.6.2007 kl. 20:55]

Útvarp Reykjavík,

nú verða sagðar fréttir.

[Atli Thor Fanndal (IP-tala skráð) 28.6.2007 kl. 12:45]

Er svo hjartanlega sammála þér, ótrúlegt hversu lítill áhugi er fyrir öllu utan höfuðborgarsvæðisinshjá Rúv, fréttastofa Rúv er þó ekki eins slæm og stöð 2 í þessum málum en það er oft hreinlega erfitt að horfa uppá það að ekkert er áhugavert utan af landi nema það sé um atvinnuleysi og volæð, eða þá um lamb sem fæddist í röngum mánuð. Ekkert annað vekur nokkra hylli fréttamanna, og nú tekur því ekki lengur að reka svæðisútvarp með 2 tíma á viku alveg hreint ótrúlegt.

[Ásthildur Cesil Þórðardóttir, 28.6.2007 kl. 15:58]

Mín skoðun er sú, að það eigi að styrkja svæðisútvörpin, og setja þau meira inn á landsdagskrána.  Segjum klukkutíma á dag frá hverju svæði.  Það myndi tengja svæðin meira saman, og við myndum fá betri heildarmynd af öllu landinu. 

Það væri líka bara gott fyrir fólkið í landinu, þar sem margir eru fluttir milli landsvæða sérstaklega til Reykjavíkur, að fá daglegar fréttir að heiman, og þennan lókal skammt af bæjarlífi og þjóðarsál úti á landi.

Í Guðsbænum RÚV, þið eruð útvarp allra landsmanna, eða viljið vera það.  Sýnið okkur það í verki með því að auka vægi svæðisútvarpanna.  Nú er daglega útvarpað frá Akureyri í heila tvo tíma.  Við viljum minnka það, og gera öllum svæðisútvörpum jafnt undir höfði.  Hvað segja menn um undirskriftasöfnun til að leggja áherslu á það ?