Á að greiða fyrir blogg?

Samkvæmt frétt í Morgunblaðinu í dag, eru uppi hugmyndir um, að greiða bloggurum fyrir skrif þeirra, og þá í samræmi við fjölda þeirra, sem lesa þau.  Þetta eru varhugaverðar vangaveltur.

Sjálfur hef ég bloggað í nokkra mánuði. Ég hef tekið eftir því, að þegar ég skrifa um dægurmál, sem hátt ber í umræðu manna í millum, eykst lestur á blogginu mínu.  Þegar ég þar í móti skrifa  t.d. um skáldskap eða aðra sérvisku, sem mér er hugleikin, snarminnkar lesturinn.  Þetta leiðir hugann að því, hvort vinsældir bloggs hafi tilhneygingu til að aukast eftir því sem umræðuefnið sé almennara.  Hinu má heldur ekki gleyma, að blogg frá "frægðarmennum" eru meira lesin en það sem hinir skrifa, sem minna eru þekktir.  En frægðin fæst, sem kunnugt er, fyrir ýmislegt annað en þá hugardýpt, sem nauðsynleg er í lýðræðislegri umræðu.  Það er nefnilega ótrúlega stutt á milli frægðar og lýðskrums.

Bloggið á að vera almennur vettvangur, án auglýsinga og peningahagsmuna.  Menn skyldu leiða hugann að því, hvert það gæti leitt okkur, ef greitt yrði fyrir það.  Tæknilega séð er t.d. ekkert mál, að mæla lestur á einstökum fréttum í dagblöðum.  Það er m.a. hægt að gera, með því að kanna, hve margir fletta þeim upp á netinu.  Á að miða laun blaðamanna við það?  

Athugasemdir

[Davíð Kristjánsson (IP-tala skráð) 21.6.2007 kl. 10:34]

Fara vinsældirna þá ekki eftir því hversu fyrirsagnirnar eru snjallar?

Þetta gæti verið áhugaverð tilraun.

[Aðalheiður Ámundadóttir, 21.6.2007 kl. 12:59]

Sammála... Mínar skoðanir eru ókeypis og ekki til sölu...

[Sigfús Sigurþórsson., 21.6.2007 kl. 13:40]

Sammála kæri Pétur, bloggið færi í tómt rugl og enginn mundi skrifa um það sem þeim væri hugleikið, skrifin yrðu um það sem skapaði þeim pening, allavega er afar mikil hætta á því hjá mörgum.

Tek undir þetta hjá þér:

Bloggið á að vera almennur vettvangur, án auglýsinga og peningahagsmuna.  Menn skyldu leiða hugann að því, hvert það gæti leitt okkur, ef greitt yrði fyrir það.  Tæknilega séð er t.d. ekkert mál, að mæla lestur á einstökum fréttum í dagblöðum.  Það er m.a. hægt að gera, með því að kanna, hve margir fletta þeim upp á netinu.  Á að miða laun blaðamanna við það?  

 

Kveðja.

[Sigurður Þór Guðjónsson, 21.6.2007 kl. 15:37]

Þekki þetta. Þegar ég skrifa um veðrið koma engir. Þegar ég skrifa um einhvern "skandal" koma þúsund. 

[Sigurður Karl Lúðvíksson, 21.6.2007 kl. 18:57]

Heyr á endemi. Hvers vegna má einkarekið fyrirtæki ekki borga hverjum sem er fyrir hvað sem er (löglegt)? Ef ykkur finnst peningar þynna boðskap einhverra ákveðinna bloggsíðna skuluð þið einfaldlega ekki lesa það. Það verða enn fullt af óborguðum  bloggurum með einhvern boðskap ykkur að skapi.

Bloggið á bara að vera það sem bloggið er, ekki einhver þröngvuð útópía minnihlutahóps.

[Apaheili, 21.6.2007 kl. 20:29]

Hvort heldurðu að seljist meira af Séð og Heyrt eða Tímariti MM?

Lýðurinn les það sem hann langar að lesa!

-ah

[María Kristjánsdóttir, 21.6.2007 kl. 20:35]

Ég er sammála þér,  Pétur. Og , Sigurður, það var enginn að tala um boðskap fremur það að ekki væri verið að stýra blogginu.

[Sigurður Karl Lúðvíksson, 21.6.2007 kl. 22:07]

María, þótt nokkrir útvaldir bloggarar fái borgað fyrir að toga lesendur inn á mbl.is, er engan vegin hægt að segja að verið sé að stýra blogginu á neinn hátt. Fólkið fær borgað fyrir að skrifa áfram nákvæmlega það sem það hefur verið að skrifa, það var nú þess vegna sem það fékk borgað upphaflega, og það að þau skrif voru og eru vinsælli en önnur blogg. Það er einfaldlega verið að hvetja þetta fólk til að halda áfram að skrifa, það sem það hefur verið að skrifa hingað til. Sé bara ekki með nokkru móti séð hverju þetta breytir um bloggið. Bloggið mun alltaf verða vettvangur frelsis til að skrifa um hugsanir sínar, peningar eða ekki, og alltaf munum við hafa frelsi til að hunsa eitt blogg en lesa annað. Hvað hefur breyst? Ekkert!

Og hvað með okkur sem kannski viljum endilega fá að lesa vinkil ákveðinna manneskja á algjörum froðufréttum? Ég held að netið mun alltaf gefa okkur öllum eitthvað fyrir okkar snúð, svo lengi sem fólk hefur a.m.k einn putta, lyklaborð og heila, í hvaða ástandi sem er. Þetta eru algjörlega tilefnislausar áhyggjur.

[Viðar Eggertsson, 21.6.2007 kl. 22:08]

Heyr! Heyr! Pétur..

[Eva Þorsteinsdóttir, 22.6.2007 kl. 05:59]

Það gefur auga leið að þeir sem eru duglegir við að tengja við fréttir fá fleiri heimsóknir en aðrir þrátt fyrir að hafa ekkert til málanna að leggja!

Það er hlutur sem mér finnst að mbl ætti að leggja niður. Ef einhver vill skrifa um frétt þá getur hann gert það á sínum forsendum, ekki til að auka ásókn í síðuna með einhverju tilgangslausu bulli!