300 mengunardauðföll á ári

Ég verð að játa, að ég varð svolítið undrandi í morgun, þegar ég hlustaði á fréttir Ríkisútvarpsins.  Var mig ekki að misheyrast, eða sagði fréttamaðurinn í raun og veru, að aðeins 14% dauðfalla á Íslandi stöfuðu af mengun?  Þetta þýðir, að sögn fréttamannsins, að árlega látast 300 manns af völdum mengunar, flestir úr lungnakrabba.

Nú vill svo til, að mengun er í langflestum tilfellum af mannavöldum og hér á landi sennilega í öllum tilfellum, nema þegar eldfjöll spúa eimyrju yfir land og lýð.  Oftast stafar þessi mengun af kæruleysi og hirðuleysi um annarra hagi, eru með öðrum orðum mannanna verk.

Enda þótt fram kæmi í fréttinni, að Ísland væri með skárri löndum hvað dauðsföll af völdum mengunar varðar, þá þykir mér satt að segja nóg um, ekki síst í ljósi vaxandi stóriðju með viðeigandi mengun.  Eða er það bara í stakasta lagi, að 14% dauðsfalla á Íslandi séu af mannavöldum?

Athugasemdir

[Hlynur Þór Magnússon, 15.6.2007 kl. 10:32]

Þarna er um ákveðnar skilgreiningar að ræða, ákveðna staðla. Auðvelt er að fá allt aðrar prósentur með því að hnika til mæliaðferðum og skilgreiningum. Með orðalaginu "aðeins" í þessu tilviki var um það að ræða, að ástandið væri nokkuð bærilegt hérlendis miðað við það sem er annars staðar.