Breytinga er þörf

Þegar ég var í skóla kom það fyrir, eins og gengur og gerist, að einhver kippti stólnum undan félaga sínum, þegar hann var að setjast, með þeim afleiðingum, að hann skall í gólfið.  Þetta gerðist ekki oft í mínum bekk og satt að segja man ég ekki nákvæmlega, hvernig þetta atvikaðist.  En eitt man ég; þegar einhver húrraði á afturendann, var það öllum ljóst, einnig honum sjálfum.

Því miður virðist það sama ekki gilda um stjórnmálamenn.  Í kosningunum um daginn var stólnum snarlega kippt undan Framsóknarflokknum, svo hann lá flatur í gólfinu og liggur þar enn.  En því miður virðast forystumenn flokksins ekki gera sér þetta ljóst.  Í raun og veru hefur ekki aðeins verið kippt undan þeim stólnum; þeim hefur beinlínis verið vísað úr stofunni.  En þeir halda áfram að tala eins og þeir standi upp við töflu með krítina í hendinni og einhver hafi áhuga á því, hvað þeir muni skrifa á tölfuna.  En því miður; öllum stendur hjartanlega á sama.

Eins er þetta með Samfylkinguna.  Eftir að hafa verið í stjórnarandstöðu allt frá stofnun flokksins, tapar hann 4,2% atkvæða og tveimur þingsætum, meðan Sjálfstæðisflokkurinn bætir við sig 2,9% og þremur þingsætum.  Samt lætur Samfylkingin eins og hún eigi erindi í ríkisstjórn með Sjálfstæðisflokknum.  Yrði það jafnaðarstefnunni til framdráttar?  Tæpast.

Sannleikurinn er sá, að forysta Samfylkingarinnar er einangrað fyrirbæri án almennrar skírskotunar út í samfélagið.  Kjarni hennar eru gamlir skólafélagar, sem á háskólaárum sínum áttu það sammerkt, að una sér helst við að munnhöggvast út í Hannes Hólmstein.  Hver eru tengsl þessa fólks við verkalýðshreyfinguna?  Þarf í þessu sambandi að rifja upp, hverjir stóðu fyrir því, að Gvendi Jaka var rutt út af Alþingi til að koma Ólafi Ragnari að?  Hver eru tengsl þessa fólks við grasrótina?  Þau eru vissulega einhver, en ekki mikil.  Og það sem verra er; þetta fólk ætlar grasrótinni að hlusta, ekki að tala.

Vissulega jókst fylgi Samfylkingarinnar undir lok kosningabaráttunnar.  En hvenær byrjaði það?  Það var þá loksins, u.þ.b. nokkrum vikum fyrir kosningar, þegar flokkurinn fór að leggja áherslu á sígilda jafnaðarstefnu.  Fram að því, var engu líkara, en að þetta fólk hefði aldrei hreyrt á þá stefnu minnst.  Og ég er sannfærður um, að það hefði ekki breytt kosningabaráttunni í þessa átt, nema vegna þess, að skoðanakannanir sýndu, að allt var að fara fjandans til.

Þegar samfylkingin var stofnuð, með samruna ólíkra afla á vinstri kanti stjórnmálanna og miðjuafla, var því miður ákveðið, að ýta öllum deilumálum út af borðinu, líkt og menn tryðu því, að þar með hyrfu þau.  Auðvitað gerðu þau það ekki.  Þegar að ýmsu leyti ólíkir aðilar hyggjast efna til samstöðu, þarf að leysa deilumálin, ekki láta sem þau séu ekki til.  Það er það verkefni, sem nú blesir við Samfylkingunni.  Að vísu er það nokkuð seint í rassinn gripið, en þó gerlegt.  En forsenda þess, að það takist er, að skipta um forystu í flokknum.  Samfylkingin þarf að losna við fólkið, sem enn er í raun að munnhöggvast við gamla skólafélaga eins og Hannes Hólmstein og staðnað á áttunda áratug síðustu aldar og fá nýtt forystulið með ferskar hugmyndir, tengs við grasrótina og næm eyru, en ekki endilega vel smurðan talanda.

Athugasemdir

[Bjarni Kjartansson, 16.5.2007 kl. 13:35]

Hvaða neikvæðu bylgjur eru þetta út í okkur 68 kynslóðina?

Við erum auðvitað flottust og ekki orð meira um það.

Ert þú núna fyrst að átta þig á því, að flestir þetta ,,vinstri-elítusett" ber sko akkurat enga virðingu fyrir verkalýðnum, þar eru bara ,,ómenntaðir dónar" sem hafa ekki ,,faglegar forsendur" fyrir skoðunum, hvað þá að þeim beri leyfi til að viðra þær.

 Nei það er einn,-hugsanlega tveir flokkar sem bera hag hinna vinnandi ,,stétta" fyrir brjósti. Annarsvegar Íhaldið og hinsvegar Frjálslyndir.

Hvenær var hlustað á, hvað réttur og sléttur iðnaðarmaður eða verkamaður, hafði til málana að leggja inna Samfó eða VG?????

Nei þú þarft að vera með Háskólagráðu, helst frá Félagsfræðideildum til að hafa góðfúslegt leyfi til að tjá þig.

Kærar kveðjur úr okkar gamla góða Miðbæ

Íslandi allt

Miðbæjaríhaldið