Ný ríkisstjórn er nauðsyn.

Þegar R-listinn bauð fram í fyrsta sinn, studdi ég hann.  Ástæðan var einföld; Sjálfstæðisflokkurinn hafði gleymt því, að hann stjórnaði borginni í umboði fólksins og fyrir það, en lét eins og hún væri eign hans.  R-listinn náði sigri og sat að völdum í 12 ár.  Þá var hann orðinn „borgareigandi", rétt eins og Sjálfstæðisflokkurinn forðum.  Þá fannst mér tímabært, að skipta út liði, eins þótt ég væri fluttur úr bænum.

Í dag er kosið til Alþingis.  Tveir flokkar eru í ríkisstjórn; annar hefur setið þar í 16 ár, hinn 12 ár.  Og enn er tími til breytinga.  Í sjónvarpsumræðum fyrir skömmu, talaði varaformaður Sjálfstæðisflokksins um „ráðuneytið sitt".  Konan áttaði sig að vísu og leiðrétti sig, með því að segja „menntamálaráðuneytið".  En stundum nær sauðagæran ekki að dylja úlfinn.  Svo fór hér.  Þegar ráðherrar eru farnir að tala um ráðuneytin sem sína einkaeign, minna þeir óþægilega á Lúðvík XIV Frakkakonung, þegar hann sagði: Ríkið, það er ég."  Lúðvík XIV hafði um sig svo glæsta hirð, að hann var kallaður „Sólkonungurinn".  En sólin hneig til viðar í lífi hans, eins og annarra dauðlegra manna.  Og þegar kista hans var borin til grafar, stóð múgurinn álengdar og gerði hróp að líkinu.  Það fer jafnan illa, þegar menn gleyma því, hvernig fór fyrir Íkarusi á flugi hans hátt uppi yfir ölluð öðrum.  Hann nálgaðist sólina um of og hrapaði til jarðar.

Núverandi stjórnarflokkar eru farnir að nálgast sólina ískyggilega.  Að vísu ekki þá sól, sem við hin sjáum skína á himni, heldur sól eigin hugaróra.  Þess vegna verður hún að falla.

Athugasemdir

[Stefán Jónsson, 12.5.2007 kl. 16:57]

Þarna hittirðu naglann algerlega á höfuðið Pjetur, ég gæti ekki verið meira sammála.
Stundum er hreinlega nauðsynlegt að gera breytingar, einungis breytinganna vegna.
Alveg sama hvaða stjórnmálaflokk maður styður, þá finnst mér það vera hornsteinn lýðræðisins að þingmenn og ráðherrar komist ekki í einhverja eilífðar áskrift að sætum sínum. Það er ekkert að ástæðulausu að við vlijum ekki hafa hér einræðisstjórn, þess vegna mega kjörnir fulltrúar ekki haga sér eins og þeir eigi land og þjóð. Eftir 16 ára einræðistilburði sjálfstæðisflokksins í ríkisstjórn finnst mér orðið svo tímabært að skipta honum út, að mér væri sama þó það kæmi ekkert í staðinn. Ég held við kæmumst alveg af án ríkisstjórnar í 4 ár

[Benedikt Halldórsson, 12.5.2007 kl. 17:53]

....gulir blýantar eru mjög áhrifamiklir í dag, ekki á morgun.