Um málefni innflytjanda

Í aðdraganda væntanlegra þingkosninga hefur Frjálslyndi flokkurinn leitt athyglina að málefnum innflytjenda.  Vissulega er þörf á því, að fólk ræði þetta viðkvæma mál.  Hinu mega menn ekki gleyma, að þar ber að fara varlega.  Vesturbæingar eiga það sameiginlegt með Varsjárbúum, að vera manneskjur.  Það er ekki aðalatriðið, hvort menn eru að vinna í byggingarvinnu á heimaslóð eða annars staðar.

Auðvitað er það ágætur siður, þegar efnt er til veislu, að bjóða ekki fleiri gestum en svo, að allir geti orðið mettir af veitingunum, sem í boði eru.  Það sama gildir um innflutning fólks; við verðum að gæta þess, að geta tekið þannig á móti því, að sómi sé að.

Ýmsir hafa orðið til þess að saka Frjálslynda flokkinn um kynþáttahyggju, sem þeir kalla raunar "racisma". Er ekki aðallega um að ræða langskólagengið fólk sem ekki þarf að óttast um kjör sín, þótt hingað komi erlendir verkamenn og iðnaðarmenn?  Ég er ekki alveg viss um, að tónninn í þessu fólki yrði sá sami, ef hingað kæmu t.d. 500 guðfræðingar og álíka slatti af viðskiptafræðingum og krefðust þess, að fá vinnu í samræmi við menntun sína.  Ef til vill snúast þessar umræður nefnilega fyrst og fremst um hagsmuni, þegar öllu er á botninn hvolft.

Ég hef sjálfur búið á erlendri grundu og þykist því þekkja nokkuð til vandans.  Um tíma starfaði ég t.d. á Háskólabókasafninu í Stokkhólmi.  Þar vann margt vel menntað fólk á hinum ýmsu sviðum, ekki síst frá Mið-Austurlöndum og latnesku Ameríku.  En ekkert af þessu fólki fékk störf í samræmi við menntun sína.  Kerfið gulltryggði það.  En það vantaði ekki, að þeir, sem í raun héldu innflytjendum frá störfum sem hæfði menntun þeirra, þættust vera víðsýnir varðandi málefni innflytjenda.  Stundum virðast skoðanir óskólagengis fólks varðandi þjóðfélagsmál vera lítt grundaðar.  En á hinn bóginn vantar ekki hræsnina, þegar ofar dregur í metorðastiganum.

Æskilegt er, að  umræðurnar um innflytjendur verði innan marka heilbrigðarar skynsemi og að fólk láti ekki tilfinningarnar hlaupa með sig í gönur.

Athugasemdir

[Hafsteinn Viðar Ásgeirsson, 3.4.2007 kl. 22:31]

http://hva.blog.is/blog/hva/entry/165819/

Það er, eins og ég sé það, mikið vit í þessum pistli hjá þér.....

[Guðrún María Óskarsdóttir., 4.4.2007 kl. 01:17]

Sæll Pétur.

Góður pistill með mikinn sannleika.

kv.gmaria.

[Sigurður Þórðarson, 4.4.2007 kl. 03:04]

Góður!

[Guðmundur Pálsson, 4.4.2007 kl. 11:00]

Ég tek undir með þér Pétur Hafsteinn.

[Guðrún Þóra Hjaltadóttir, 4.4.2007 kl. 18:21]

Þetta er rétt hjá þér Pjetur, umræðan hefur aldrei komist á þetta stig. Það er deginum ljósara ef að nýbúar þessa lands færu að keppa við lækna, lögfræðinga og viðskiptafræðinga svo ég nefni nú ekki stórkaupmenn og ráðherra.

Þá væru þeir snöggir að leysa málið, eða hvað?

[Haraldur Haraldsson, 6.4.2007 kl. 15:53]

Ja´eg er þer sammála Pjetur,það mundi heirsat i sumum ef menn hálærðir kæmu i buntum hingað!!!en svo ekki alveg sammlál þessu með Vesturbæjingana þeir eru bara ekki neitt betri en við Austan við læk/Halli Gamli

[Baldur Kristjánsson, 9.4.2007 kl. 17:07]

Ég er langt ífrá sammála þér Pétur með háskólamenntaða fólkið, það er óþarfi að búa til úr því einn pakka. Við þurfum að leggja áherslu á að láta það fólk sem hingað kemur njóta menntunar sinnar og fá fólk hingað með sem víðtækasta menntun. Rétt er það hins vegar að stéttarfélög hvers konar hneigjast til varðstöðu. Góður pistill eigi að síður.  B. kv.