Enn eitt dauðaslysið á Suðurlandsvegi

Í hádeginu í gær varð enn eitt dauðaslysið á Suðurlandsvegi, í þetta sinn rétt vestan við Kotströnd. 43 ára fimm barna móðir fórst í árekstri jeppa og vörubíls.  Auðvitað verður aldrei um of brýnt fyrir ökumönnum, að fara varlega í umferðinni.  Það breytir ekki því, að ef Suðurlandsvegurinn væri tvöfaldur með aðskildum akstursstefnum, hefði þetta slys tæpast orðið.

Tvöföldun þjóðvegar 1, bæði til norðurs og austur frá Reykjavík er nauðsyn, sem vonandi verður framkvæmd á næstu misserum.  Til að byrja með þarf að leggja slíkan veg milli Reykjavíkur og Selfoss og eins milli Reykjavíkur og Akureyrar.  Að eyða svo mikið sem andartaki í umræður um Bónusveg yfir háldendið er út í hött.

Athugasemdir

[Valdimar Gunnarsson, 22.3.2007 kl. 21:07]

Reyndar er tvöföldun ekki endilega lausnin heldur fyrst og fremst aðskilnaður akreina í gagnstæðar áttir. Ef miklu víðar er hægt að koma slíkum aðskilnaði á með því að hafa til skiptis eina og tvær akreinar er sjálfsagt að nota þá lausn fremur en tvöföldun alstaðar.  

Aðskilnaður - t.d. með vegriði - er lausnin sem máli skiptir, 1+2 eða 2+2 er svo annað mál. 

[Hafsteinn Viðar Ásgeirsson, 23.3.2007 kl. 15:40]

Algerlega sammála þér um þetta Valdimar...