Bensíndælur handteknar

Auðvitað ráðið þið hvort þið trúið mér, en þannig er, að ég var rétt að koma frá bensínstöðinni, þar sem ég ætlaði að fylla tankinn.  En hvað haldið þið, að hafi gengið á þar?  Ja, það var hreint ekki svo lítið.  Þarna var mættur flokkur röskra lögreglumanna og sem ég ók upp að einni bensíndælunni, tjáði varðstjóri þeirra félaga mér valdsmannslegri röddu, að þarna væri sko ekkert bensín að fá.

„Ha," sagði ég „ekkert bensín?"

„Nei," svaraði varðstjórinn. 

Ég spurði, hvernig gæti staðið á því og ekki stóð á svari: „Olíufélögin hafa játað á sig ólöglegt verðsamráð.  Þau orð standa.  En nú hefur Hæstiréttur sýknað forstjórana, en þeir einir voru dregnir fyrir dóm.  Það er því augljóst, að samráðið hefur átt sér stað milli dælanna, einhver er jú sekur í þessu máli." Síðustu orðin lét varðstjórinn falla með þeim þunga, sem valdið eitt veitir mönnum í þar til gerðum stöðum.  Að svo mæltu brá hann keðju utan um dæluna, en röskir undirsátar hans, losuðu hana frá jörðu og færðu hana inn í lögreglubifreið.  Þangað voru hinar dælurnar á stöðinni þegar komnar.  Mér er sagt, að hér hafi verið um samræmdar aðgerðir að ræða og allar bensíndælur landsins hafi því verið handteknar samtímis.  Þær geta víst átt von á þriggja til fimm ára dvöl á Litla-Hrauni. 

Athugasemdir

[Heimir Lárusson Fjeldsted, 18.3.2007 kl. 19:29]

Það er engu líkara en lögin séu sérsniðin til að forða hvítflibbaglæponum frá refsingu.

Mörgum er óglatt þessa dagana.

[Grímur Kjartansson, 18.3.2007 kl. 22:23]

Því voru forstjórar grænmetisfélaganna ekki ákærðir?
Annars ættu almennt stofnanir og fyrirtæki að geta heimtað bætur frá fyrverandi stjórnendum sem hafa valdið skaða í stað þess að afhenda þeim feitan starfslokasamning.

[Sigurður Ásbjörnsson, 19.3.2007 kl. 00:09]

Ég get upplýst það að nokkrir þingmenn hafa ítrekað gert athugasemdi við það að Kristinn Björnsson hafi ítrekað verið á ferðinni sem maki forseta þingsins á ferðum í útlöndum og ríkissjóður borgi brúsann með uppihaldi þeirra hjóna.  Frú forseti átti vitaskuld afkomu sína undir því braski sem stundað var af bóndanum.  Nú eru þau vel stæð og þurfa ekki að lyfta litla fingri eða óhreinka sig það sem eftir lifir ævinnar.  Hann seldi sinn hlut í Skeljungi og þau hafa það fínt sem efnaðir fjármagnseigendur.

[Jón Steinar Ragnarsson, 19.3.2007 kl. 00:11]

Já, suður ameríka er víða.

[Vilborg Eggertsdóttir, 19.3.2007 kl. 00:45]

Er ekki alveg að átta mig á uppá hvað tímum ég er hér í jarðlífinu, kannski á tímaflakki? Ó, þú upplýsta þjóð mín

[Birgir Guðjónsson (IP-tala skráð) 19.3.2007 kl. 09:18]

Vill einhver banana ?

[Sigurjón N. Jónsson, 21.3.2007 kl. 16:53]

Við verðum að vera með réttar staðreyndir á hreinu í þessu máli eins og öðrum.  Kristinn er saklaus og hefur ekki framið neitt sem er hægt að sanna á hann.  Mér finnst mikilvægara að horfa á önnur alvarlegri mál sem skipta borgara þessa lands miklu meira eins og Baugsmálið þar sem peningar streyma frá neytendum í erlend fjárfestingarævintýri sem gagnast ekki íslensku þjóðinni neitt.

[Hafsteinn Viðar Ásgeirsson, 24.3.2007 kl. 18:13]

Ég sé að Sigurjón gerir greinarmun á réttum staðreyndum og þá sennilega röngum???? Ég hélt að staðreynd væri bara staðreynd???Kristinn er yfirlýstur þjófur og hefur meira að segja viðurkennt það sjálfur, hann sleppur við dóm á lagatækniatriðum? Ummælin um Baugsmál eru svo vitlaus að ekki er hægt að kommenta á þau, auk þess hefur enginn verið dæmdur þar ennþá nema ríkissaksóknari.....