Pjetur Hafstein Lárusson

9.3.2007 | 12:17

Er kvótakerfið æðra boragarlegu lýðræði?

Í Fréttablaðinu í dag er haft orðrétt eftir Geir Haarde forsætisráðherra í sambandi við breytingartillögu stjórnarflokkanna á stjórnarskránni: „Þetta hefur táknræna þýðingu, en ekki það að það breyti núverandi skipan mála, hvorki varðandi það að hægt sé að kippa grundvellinum undan atvinnugreinum, né að atvinnugreinar geti aukið sinn eignarétt frá því sem nú er. Eignarétturinn sé óbeinn og verði það áfram." Tilvitnun lýkur.

Merkir þetta, að Sjálfstæðisflokkurinn hafi látið Framsóknarflokkinn teyma sig út í það, að breyta grundvallarhugsun vestrænna lýðræðisþjóða varðandi hugtakið stjórnarskrá? Íslenska stjórnarskráin er sniðin að þeirri dönsku. Á danskri tungu er orðið „grundlov" notað yfir það, sem við köllum stjórnarskrá. Það er því ljóst, að stjórnarskrá er grundvöllur allrar lagasetningar. Með slík grundvallaratriði geta menn ekki leikið sér, eins þótt sá leikur geti framlengt líf ríkisstjórnar um nokkrar vikur fram að kosningum.

Sjórnarskrár eru afsprengi lýðræðishugsjóna borgarastéttar 18. og 19. aldar. Þeim er ætlað að setja stjórnvöldum ákveðnar og ljósar skorður gagnvart almenningi. Þess vegna verður hvert einasta ákvæði þeirra að vera hafið yfir allan vafa.

Ber að skilja þessa loðnu breytingartillögu á stjórnarskránni svo, að umdeilanlegur nýtingarréttur einstaklinga og fyrirtækja þeirra, sé tekinn fram yfir grundvallar hugsun boragarlegs lýðræðis?

Flokkur: Stjórnmál og samfélag | Facebook