Fréttamennska fyrir neðan allar hellur

Það er undarleg árátta, sem gripið hefur um sig hjá fjölmiðlum, að lýsa í smáatriðum viðurstyggilegri meðferð kynferðisafbrotamanna á fórnarlömbum þeirra.  Eins og heyra mátti í fréttatíma ríkissjónvarpsins nú í kvöld, þá skirrast þeir jafnvel ekki við að lýsa því út í ystu æsar sem gerst hefur. Í þessu tilviki var fórnarlambið aðeins fimm ára gamallt.  Hver er tilgangurinn?  Hvernig telja viðkomandi fréttamenn, að börnum, sem heyra slíkar fréttir líði? Börn eru vakandi á fréttatíma sjónvarps og heyra því oft fréttirnar án þess að vera sérstaklega að hlusta á þær.  

Ég er ekki að saka fréttamenn um slæmt innræti, síður en svo.  En skyldi það nokkuð saka, að þeir veltu fyrir sér afleiðingum af svona fréttaflutningi?  Ég er sannfærður um, að þetta háttarlag getur skaðað fórnarlömbin, sem í hlut eiga.  Og því má heldur ekki gleyma, að svona fréttamennska deyfir siðferðisvitund almennings, þegar til lengdar lætur.  Þetta á ekki hvað síst við um blaðamennina sjálfa.  Þeir ana sífellt lengra og lengra út í fúafen siðleysisins. 

Ef blaðamenn vilja láta taka sig alvarlega, þá verður þeim að vera ljóst, að það er munur á því, sem hægt er að segja í kunningjahópi og hinu, sem menn láta ganga yfir þjóðina.  Svona fréttamennska er einfaldlega fyrir neðan allar hellur.

Athugasemdir

[Sveinn Ingi Lýðsson, 21.2.2007 kl. 21:54]

Ég hjó sérstaklega eftir framsetningu þessarar fréttar.  Frétt var þetta, það er ekki spurning, en framsetningin einstaklega ósmekkleg.  Þetta þarf ekki.  Aðgát skal höfð í nærveru sálar er alltaf í fullu gildi.

[hafliði vilhelmsson (IP-tala skráð) 21.2.2007 kl. 22:10]

Hjartanlega sammála, það er ekki vært við eldhúsborðið lengur því það er aldrei að vita fyrr en Rúv dembir yfir mann grafískum klámlýsingum. Ekki beint lystaukandi og ekki hollt börnum að heyra svona ófögnuð. Hvað gengur þeim til hjá fréttastofunni, hver vill heyra öll smáatriði glæpanna.

Hafliði Vilhelmsson

[Sigurður Þór Guðjónsson, 23.2.2007 kl. 00:24]

Pjetur minn gamli vinur! Er þér og öðrum nokkur vorkunn að vita hvað börnin  þurfa að reyna á sínum líkama. 

[Sigurður Þór Guðjónsson, 23.2.2007 kl. 01:24]

Að menn skuli svo leyfa sér að jafna lýsingu á kynferðislegri misnotkun á börnum við klám nær engri átt. Ég er ekki vanur að gera athugasemdir við athugasemdir á bloggsíðum en geri það þá núna í fyrsta sinn