Landfræðileg þröngsýni í Ríkisútvarpinu

S.l. laugardag hlustaði ég á ágætan útvarpsþátt, auðvitað á Rás 1, aðrar útvarpsstöðvar hlusta ég ekki á, ótilneyddur.  Nema hvað, þarna var verið að kynna málþing um Guðrúnu frá Lundi, sem halda skal n.k. laugardag á Sauðárkróki.

Ég verð að játa, að ég hef aldrei lesið bækur Guðrúnar frá Lundi.  En sem drengur hlustaði ég að þær lesnar í útvarpinu og hafði gaman af.  Ég man aðeins óljóst um hvað þær fjölluðu, en samt sitja þær í minni mér, eftir öll þessi ár.  Slíkt verður tæpast sagt um marklaus ritverk. Sennilega er orðið tímabært, að glugga í verk þessar ágætu skáldkonu. 

Nú jæja, í umræddum útvarpsþætti var spjallað við nokkra ágæta menn og konur, sem munu fjalla um Guðrúnu og verk hennar á þessu málþingi.  En svolítið þótti mér skjóta skökku við, þegar þáttarstjórnandinn tók það fram, að ástæða þess, að fjallað var um málþingið, viku áður en það skyldi haldið, væri sú, að það væri haldið svo langt í burtu og ekki einu sinni tekið fram, langt í burtu hvaðan.

Nú er það svo með fjarlægðir, að þær mótast að staðsetningu þess, er í hlut á.  Auðvitað er nokkuð langt milli Reykjavíkur og Sauðárkróks, eða Djúpavogs og Sauðárkróks.  Aftur á móti er harla stutt milli Akureyrar og Sauðárkróks eða Siglufjarðar og Sauðárkróks, svo dæmi séu tekin.  Því þóttu mér fyrr nefnd orð hins ágæta þáttarstjórnanda,  bera þess merki, að heimur hans næði ekki ýkja langt austur fyrir Elliðaár.  Það er vitanlega hans mál.  En Ríkisútvarpið er útvarp allra landsmanna, ekki „Radio Reykjavík 101".

Vonandi mæta sem flestir á málþingið um Guðrúnu frá Lundi, n.k. laugardag, hvort heldur þá ber langt að, eða skammt.

Athugasemdir

[SKEGGSSTAÐIR 541 BLÖNDUÓS, 10.8.2010 kl. 23:24]

Sæll.

Já, Reykjavík virðist oft  vera nafli alheimsins í augum allflestra starfsmanna RÚV og allt virðist miðast út frá Höfuðborginni okkar.  En mig langar bara svona að leiðrétta að málþingið verður haldið á Ketilási í Fljótunum.

Með kveðju,

Guðrún (langömmubarn Guðrúnar frá Lundi).

[Pjetur Hafstein Lárusson, 11.8.2010 kl. 06:43]

Bestu þakkir fyrir leiðréttinguna Guðrún.  Gangi ykkur vel.