Ríkisútvarpið í hættu

Menntamálaráðherra hefur boðað, að enn skuli hert á sparnaðaraðgerðum hjá Ríkisútvarpinu.  Nú á að spara um 9%.  Þetta mun væntanlega þýða enn minna af aðkeyptu efni og lélegri fréttaflutning.  Hvoru tveggja er alvarlegt mál.  Auk þess má vænta uppsagna, bæði á fréttastofu og meðal dagskrárgerðarfólks. 

Ljóst er, að þetta mun leiða til enn lakari fréttaflutnings og er hann þó ekki merkilegur fyrir, síst hjá sjónvarpinu.  Auk þess má vænta þess, að annað dagskrárefni verði ver unnið en hingað til.

Þetta er slæm þróun, ekki síst í ljósi þess, að Ríkisútvarpið er, þrátt fyrir allt, flaggskip íslenskra fjölmiðla.  Ríkisútvarpið á að vera í öndvegi, hvað varðar upplýsingamiðlun til almennings, sem og miðlun menningarlegs efnis af ýmsu tagi.

Væri nú ekki ráð, að spara ferkar, þar sem spara má að skaðlausu?  Til hvers á ríkið t.d. að leggja fram 80% af rekstri einkaháskóla?  Getur Viðskiptaráð ekki rekið Háskólann í Reykjavík?  Og hví á almenningur að fjármagna Háskólann í Bifröst eða Keili?  Hræða sporin frá Hraðmenntaskólanum ekki?  Þannig mætti lengi telja. 

Aðhald í fjármálum er nauðsynlegt, ekki aðeins á krepputímum eins og nú.  En aðhald í alþýðumenningu eins og hjá Ríkisútvarpinu getur verið stór skaðlegt.

Athugasemdir

[Eiður Svanberg Guðnason, 30.7.2010 kl. 14:11]

Það er líka ótrúlega vitlaus stjórnunaraðferð að reka reynslubolta og  ráða viðvaninga í þeirra stað.

[Margrét Sig (IP-tala skráð) 30.7.2010 kl. 14:17]

Hvernig væri að nefna það að það var hún Þorgerður Katrín Gunnarsdóttir sem kom á 17.000 kr nefskatti á hvern landsmann hvort heldur hann býr hér eða erlendis. Dagskráin er svo alveg sér kapituli í sumar td hefur aðeins einn þáttur verið á dagskrá sem horfandi var á,en það voru berlínaraspirnar. Amen.

[Árni Gunnarsson, 30.7.2010 kl. 17:33]

Dagskrá sjónvarps hefur lengi verið afleit en nú keyrir um þverbak. Mér er til efs að hægt sé að tengja þessa afþreyingarþætti undir menningarstarfsemi. Það ætti að vera auðvelt að styrkja aðrar sjónvarpsstöðvar til að sýna valdar myndir sem unnar væru með styrkjum frá Ríkinu.

Ég hef rætt við fjölmargt fólk sem segist aldrei horfa á sjónvarp Rúv nema þá helst á kvöldfréttatíma.

Ríkið á að reka metnaðarfulla útvarpsstöð og hefur staðið sig vel í því hlutverki í 80 ár.

RÚV er orðið athvarf fyrir einkavini stjórnendanna.

[Dingli, 31.7.2010 kl. 05:36]

17.000 x 300.000= 5milljarðar og eitt hundrað þúsund! Hvað er í þessum tölum? Útvarp, sjónvarp, rekstur dreifikerfis og hvað, sinfónían? Að auki eru miklar auglýsingatekjur. Ætla að leita að bókhaldinu!