Rangæingar á réttu róli

Á landsfundi Sjálfstæðisflokksins, fylgdi séra Halldór Gunnarsson í Holti undir Eyjafjöllum eftir samþykkt fulltrúaráðs Sjálfstæðisflokksins í Rangárþingi, og skoraði á þá fulltrúa flokksins á Alþingi og í sveitastjórnum, sem þegið hafa styrki frá vafasömum aðilum, að segja af sér.  Nefndi hann sérstaklega í þessu sambandi þá Guðlaug Þór Þórðarson alþingismann og Gísla Martein Baldursson borgarfulltrúa.

Eitthvað virðist þessi málflutningur klerksins hafa farið fyrir brjóstið á flokksforustunni, því hún kom í veg fyrir, að tillaga hans um þetta efni, færi inn í stjórnmálaályktun fundarins.  Lagði séra Halldór tillöguna þá fram sem fundarsamþykkt og fór allt á sama veg, fundarstjóri, Ragnheiður Ríkharðsdóttir alþingismaður,  taldi ekki þörf á atkvæðatalningu og sagði tillöguna fallna.  Við þetta kom upp kurr meðal fundarmanna og var atkvæðagreiðslan þá endurtekin.  Reyndist hún hafa verið samþykkt.

Fótgöngulið Sjálfstæðisflokksins sýndi þarna flokksforystu sinni meiri hörku en forysta Samfylkingarinnar hefur mátt þola frá sínu fólki.  Ætli Sjálfstæðisflokkurinn sér framtíð í íslenskum stjórnmálum, tekur hann tillit til þessa.  Og ef fótgöngulið Samfylkingarinnar vill ekki að flokkur þess dagi uppi, tekur það á sig rögg og sýnir spillingaröflum síns flokks rauða spjaldið, eins og Sjálfstæðismenn hafa nu gert á sínum vallarhelmingi.

Athugasemdir

[Jón Baldur Lorange, 27.6.2010 kl. 19:16]

Rétt metið hjá þér gamli félagi. Sjálfstæðismönnum þykir vænna um flokk sinn en svo að láta þetta styrkjamál, þá aðallega Guðlaugs Þórs, daga uppi. Þeir ætla ekki að láta sárafáa einstaklinga skaða flokkinn frekar en orðið er. Rangæingar með Halldór í Holti í forystu skoruðu mark á landsfundinum. Geir Waage flytti einnig magnaða hugvekju á landsfundinum um siðferði.  

[Dingli, 27.6.2010 kl. 23:37]

Spillingin í Sjálfstæðisflokknum nær miklu dýpra en til þeirra aura sem gaukað var að Guðlaugi. Og miklu, miklu dýpra en klinkið sem Gísli litli fékk í kosningasjóð sinn. Gísli Marteinn má þó eiga það að hann stóð sig vel við að stöðva ránið á Orkuveitunni. Kannski á að slátra honum þess vegna!

Þið vitið er það ekki, að þúsundum milljarða! var stolið af Íslensku þjóðinni undir stjórn Sjálfstæðisflokksins.

 Eitt eða tvö jeppaverð til kosningasjóða heimskulegra prófkjara, er sem flugnaskítur á vegg í samanburðinum. 

[Jón Snæbjörnsson, 28.6.2010 kl. 10:40]

sammála ykkur Pjetur Hafstein og Jón Baldur