Enn ein frestun á skýrslu sannleiksnefndar

Sannleiksnefndin, sem sumir kalla svo, hefur nú framlengt tíu daga andmælarétt þeirra, sem nefndir eru í skýrslu hennar um fimm daga.  Þetta þýðir enn frekar frestun á birtingu skýrslunnar.  Þótti þó ýmsum nóg um fyrir.

Eins og menn vita, er nefndinni aðeins ætlað að varpa ljósi á hrunið haustið 2008 og aðdraganda þess.  Niðurstaða hennar verður því ekki dómsúrskurður.  Telji menn ómaklega að sér vegið í skýrslunni, geta þeir væntanlega leitað réttar sín fyrir dómstólum.  Það verður því að teljast orka tvímælis, að um andmælarétt sé að ræða fyrir birtingu skýrslunnar. 

Hvað ætlar nefndin að gera með andmælin?  Hyggst hún ef til vill  breyta skýrslunni með tilliti til andmælanna, áður en hún verður birt almenningi? 

Sæmileg sátt virðist hafa ríkt um störf þessarar nefndar.  Frekari frestun á skýrslu hennar er einungis til þess fallin, að draga úr þeirri sátt og um leið trúverðuleika nefndarinnar.  Það væri skaði, jafn lítið og eftir er í þessu landi, sem hægt er að treysta á, nema þá staðreynd, að daginn er tekið að lengja.  Og veitir ekki af í öllu svartnættinu.

Athugasemdir

[Ragnar Eiríksson, 17.2.2010 kl. 23:59]

Einhvern tíma sögðu nefndarmenn að andmælin skiptu engu máli fyrir efni skýrslunnar og þau mætti birta síðar.    Það finnst mér líka rétt viðhorf - varla eru nefndarmenn svo vesælir að ætla að laga skýrsluna eftir athugasemdunum.   Þá er eins gott fyrir þá að birta bara valda kafla úr Mogganum!

[Hildur Helga Sigurðardóttir, 18.2.2010 kl. 07:22]

Það er með ólíkindun -og fer að verða frekar vandræðalegt- að þessi skýrsla skuli ekki fara nað birtast.

[Sveinn Elías Hansson, 18.2.2010 kl. 12:27]

Það er verið að bíða eftir rétta deginum til að birta þessa skýrslu.

Helst þurfa að vera uppþot og læti á landinu, þá verður skýrslunni laumað á netið svo lítið beri á.