Verður ekki að takmarka jöklaferðir?

Fyrir skömmu varð það hörmulega slys á Langjökli, að kona og sjö ára sonur hennar féllu niður í sprungu.  Konan beið bana, en drengnum var bjargað. 

Menn kynnu að ætla, að fólk lærði eitthvað af svona hörmungar atburðum.  En það virðist ekki eiga við um alla.  Í gær villtist útlend kona og tólf ára sonur hennar á jöklinum.  Urðu þau viðskila við ferðafélaga sína.  Allt er þetta fólk óvant jöklaferðum, að sögn fjölmiðla.

Nú fór betur en á horfðist og fannst fólkið heilt á húfi í nótt, eftir að u.þ.b. 300 björgunarmenn höfðu verið kallaðir til við erfiðar aðstæður.  Skyggni var slæmt og veður válynd.  Hvorugt kom á óvart, því Veðurstofan hafði varað við þessu.  Auk þess hefur það ítrekað komið fram, að hlýindin í vetur gera jöklaferðir að mun meira hættuspili en verið hefur.  Hljóta slíkar ferðir fólks, sem ekki er vant svona ferðalögum þó jafnan að orka tvímælis.

Það skuggalega í sambandi við leitina í gær og í nótt er, að mæðginin voru í ferð með hópi fólks, sem leigt hafði snjósleða hjá íslenskri sleðaleigu.  Menn hljóta í framhaldinu, að velta alvarlega fyrir sér ábyrgð eigenda þeirrar leigu, sem og hinu, hvort ekki sé nauðsynlegt, að takmarka ferðir sem þessar.

 

 

Athugasemdir

[Adda Þorbjörg Sigurjónsdóttir, 15.2.2010 kl. 10:51]

Mér finnst frekar að skylda ætti þá sem fara að vera með staðsetningartæki á sér.

[Sigurður Þór Guðjónsson, 15.2.2010 kl. 11:37]

Þarna virðist ekkert hafa verið skeytt um það þó varað hafi verið við veðrabreytingum í marga daga sem gekk svo eftir. Ekki í fyrsta sinn sem menn hafa veðurspár að engu.

[Guðjón Sigþór Jensson, 24.2.2010 kl. 13:18]

Svona starfsemi á að vera leyfisskyld og eftirlitsskyld. Þannig á ekkert fyrirtæki að geta skipulagt ferðir án þess að hafa til þess tilskilin leyfi og að allt öryggi sé eins og það best verður á kosið. Tryggingamál eru sennilega meira og minna í ólestri, hugsunarhátturinn „þetta reddast“ virðist því miður vera allt of algengur.

Kveðja

Mosi