Regnið er blautt fyrir sunnan

Amma mín og fóstra, hverrar blessuð sé minning, var sómakona.  En hún var forhertur Reykvíkingur.  Í þrjátíu ár bjó hún hér norður á Akureyri, í sjálfri stássstofu íslenskra byggða.  Og þegar staðarmenn stríddu henni, með því að benda henni á regnið í Reykjavík, sagði hún án þess að blána eða blikna, að regnið í Reykjavík væri þurrt. 

 

Þessa dagana dvel ég á Akureyri til að safna lofti í lungun.  Mér er þetta nauðsynlegt á hverju ári.  Hann rigndi í dag.  En ég sá það aðeins á gangstéttum bæjarins; regnið var svo milt, að ég fann ekki fyrir því.

Þetta þýðir, að regnið á Akureyri er þurrt.

 

Og berst nú ekki sú frétt úr suddanum fyrir sunnan, að ríkisstjórnin hafði samið við Breta og Hollendinga um Icesave-reikningana.  Ónefndur afdankaður stjórnmálamaður sá um "samningaviðræðurnar" fyrir Íslands hönd.  Hvers vegna sé ég fyrir mér fræga ljósmynd af Keitel marskálki, þegar hann skrifaði undir skilyrðislausa uppgjöf Þjóðverja í mai 1945?  Skyldi fulltrúi Íslands í viðræðunum, hafa lagt marskálksstaf á borðið, áður en hann páraði undir plaggið?

  

Athugasemdir

[Jóna Kolbrún Garðarsdóttir, 7.6.2009 kl. 04:21]

Það er alltaf logn á Seltjarnarnesi, það fer bara misjafnlega hratt yfir. 

[Sigurður Þórðarson, 7.6.2009 kl. 07:16]

Sæll Pétur.

Mergjaður pistill og kaldhðin en því miður sönn samlíking.

[Gunnar (IP-tala skráð) 7.6.2009 kl. 09:47]

Mér hefur alltaf fundist þráhyggja Agureyringa hvað rigningu varðar merkileg. En ef maður hugsar málið til enda þá er skýringing augljós. Það rignir nefnilega beint upp í nefið á flestum Agureyringum og þess vegna er mjög eðlilegt að hún eigi athygli þeirra alla.

[Páll A. Þorgeirsson, 7.6.2009 kl. 13:40]

Búið hef ég á báðum stöðum og aldrei orðið var við "þráhyggju" hjá norðan- eða sunnanmönnum varðandi regnið eins og hann Gunnar orðar það.  Eini munurinn á "rigningunni" er sá að oftar rignir lóðrétt á Akureyri en í Reykjavík og samkvæmt "kenningu" Gunnars þá stöndum við sennilega "á haus" hér fyrir norðan í rigningunni.  Annars hefur "lítið" verið um regn það sem af er ári á Akureyri og ekki mikill "lofthiti".  Svona að lokum, þá held ég mig við "k-ið" í Agureyri, mér finnst það fallegra   og reyndar líka í Reykjavík. 

Vonandi hefur þú það sem best hér fyrir norðan, ekki láta "markskálkinn", staf hans né samning skemma dvölina.